Jakob Tunumi qimussillaqqinnerpaavoq
Tasiilami qimussit arfinillit sukkaniupput. Sukkanerpaavoq Jakob Mikaelsen.
Arfininngormat apriilip 3-ani 2010-mi qimussimik sukkaniuttoqarmat misilittagartooq Jakob Mikaelsen ajugaavoq.
Aqqaneq marlunnik qimmeqarluni akunnerit marluk minutsillu 8 atorlugit ajugaavoq. Minutsit tallimat qaangiutiinnartut 21-nik ukiulik Aqqaluk Larsen aappaatut apuuppoq arfineq marlunnik qimmeqarluni. Pingajuattut apuuppoq Jokum Brandt.
Sukkaniunneq Tasiilap kangerluani nalunaaqutaq 13 aallartinneqarpoq.
Katillugit qimussit arfineq marluk sukkaniunnermi peataapput innuttaasut nuannisaqalutik isiginnaartoqarlugit. Poorskip sapaataanni nuannisarneq naginneqarpoq arnat qimussernerannik.
Tassani ajugaasuuvoq Karita Lyberth, akunneq ataaseq minutsillu 25-t atorlugit siulliulluni apuuttoq. Tullertut inissippoq Angeuk Ignatiussen akunneq ataaseq minutsillu 26-t atorlugit apuuttoq. Pingajuattut inissippoq Rhea Holbech akunneq ataaseq minutsillu 32-t atorlugit apuuttoq.