Kalaaleq Christianiarmiu anisinniarpaat

Arnaq kalaaleq Stjerneskibimit anisitaasussanngorpoq inigisamini najugaqarnissaminut akuersissummik peqannginnami.

Stjerneskibet. Assi: Polfoto/

Inatsisit inatsisaapput, malinneqartussaallutillu. Tamannali ajornakusoorsinnaasarpoq. Ingammik inatsit immikkut ittoq Christiania pillugu inatsit 2004-meersoq pineqartillugu.

Tassani ilaatigut ima aalajangersagaqarpoq kikkut Christianiami najugaqarlutillu suliffeqarfimmik ingerlaqtsisinnaanersut. Maannakkut aaqqiagiinngissutaalerpoq najugaqatigiit suunersut, aviisi Information allappoq.

Pineqartoq tassaavoq Christianiami Stjerneskibet, ilaatigut kalaallinit arlalinnit najugarineqartoq. Namminersornerullutik Oqartussat siusinnerusukkut aningaasaliissuteqarsimapput Stjernerskibip kalaallinit arlalinnit najugarineqarlunilu angerlarsimaffeqanngitsunit oqqiffiusartup iluarsaannissaanut.

Najugaqartunit inigisaq najugaqatigiiffittut taagorneqanngilaq, taamaattutulli atorneqarluni. Init ataasiakkaat saniatigut ataatsimoorussamik uffarfeqarpoq, igaffeqarluni isersimaartarfeqarlunilu.

1980-ikkulli aallartinnerani Stjerneskibet isumaginninnermik suliaqartumit ataavartumik nakkutigineqarpoq. Stjernerskibetilu Københavimi kalaallinit najugaqartunit oqqiffissatut atorneqarmat Christianiamit mamiatsaatigineqaqaaq Slots- og Ejendomsstyrelsimit najugaqartut ilaat inigisaminit anisinneqarniarmat. Tassaavorlu inuk Christianiami kalaallit akornanni isumaginninnikkut qitiusutut inissisimasoq.

Tassaavoq arnaq kalaaleq Stjernerskibimi ukiuni sisamani najugaqarsimasoq.

Slots- og Ejendomsstyrelsenip (SES) nalunaaruteqarneratuut atuinissaminut akuersissummik qinnuteqarsimanngilaq, soorlu tamanna Christiania pillugu inatsimmi najugaqarniartunut piumasaqaataasoq. Arnaq isumaqarpoq najugaqatigiiffimmi najugaqartuulluni, taamaattumik immikkut ittumik inuttut kisimiittutut qinnuteqarnissaminut pisariaqarani.

SES-ili isumaqarpoq, arnaq akuersissutitaqanngitsumik Christianiami najugaqartoq, anisariaqarlunilu. Najugaqatigiiffimi najugaqarfigisaa aqutsisoqarfimmi najugaqatigiiffittut nalunaarsorneqarsimanngilaq.

Taama pisoqartorlu Christianimut inatsisileritooq Knud Foldschack SES-imut saaffiginnippoq taama aalajangiineq atorunnaarseqqullugu.

– Najugaqatigiiffittut nalunaarsorsimannginneq tunngavigalugu arnamik najugaqatigiiffimmi ukiuni sisamani najugaqarsimasumik anisitsiniarneq silaqanngitsuliorneruvoq. Taassuma saniatigut pineqartoq tassaavoq peqatigiiffimmi kalaallit atornerluinerannik akiuiniarluni suliniaqatigiiffimmi siulittaasoq, Knud Foldschack oqarpoq.

Isumaqarpoq tamanna takussutissaasoq SES-imit Christiania pillugu inatsimmi aalajangersakkat sukangasuut silatusaarnermit salliutinneqartut.

Powered by Labrador CMS