Meeqqamik atornerluisimasoq Paamiuni taartaasimavoq
Atsiorluni uppernarsaasalernissamik inatsit atulerpat meeqqanik kinguaassiuutitigut ikkatilliisimasutut pineqaatissinneqarsimasut atorfinitsinneqartarnerat pingitsoortinneqarsinnaalissaaq.
Nakorsaq niviarsiaqqamik qulit 14-llu akornani ukioqartillugu atornerluisarsimasutut 2008-mi ukioq ataaseq isertitsivimmiittussanngorlugu pineqaatissinneqarpoq, KNR-ip radioaviisia tusarliivoq.
Nakorsaq pisuutinneqarnini pillugu Danmarkimi tv-kkut aallakaatitassiamut peqataavoq, nunatsinnilu isiginnartartut ilaata ilisaralugu KNR-imut saaffiginnissutigaa.
Peqqissutsimut naalakkersuisoqarfimmi pisortap Ann Birkekær Kjeldsenip erseqqissarpaa kangutsaatsuliornernik assigisaanillu nalunaaruteqartoqarsimanngitsoq.
Nakorsat Kalaallit Nunaanni atorfinitsinneqaraangata pinerluuteqarsimaneri misissorneqarneq ajorput. Inatsisilli nutaap atuutilerneratigut siunissami atorfininniarlutik qinnuteqartut ukiukittunik atornerluisimasutut pineqaatissinneqarsimanersut takuneqarsinnaalerumaartoq, Ann Birkekær Kjeldsen oqarpoq.
Nakorsaq pineqartoq Paamiuni taartaajunnaareerpoq, peqqinnissaqarfimmilu vikaritut atorneqaqqinnissaa pilersaarutaanngitsoq naalakkersuisoqarfimmi pisortaq Ann Birkekær Kjeldsen erseqqissaavoq.