Siriusip Tartupaluk aaqqiagiinngissutaajunnaarsisinnaavaa

Sakkutuut qimussersartut Nares-strædimi, Tartupaluup inissisimaffiani, Canadamiut sakkutuuisa sungiusarneranni peqataassapput.

Qimusserlutik sakkutuut Sirius, Tunup avannaani nalinginnaasumik angalaartartut, ukiorpanni Tartupaluk pillugu Canadamiut qallunaallu aaqqiagiinnginnerat 1973-miilli nunat aallartitaannit sorsuutigineqartoq oqaluttuaannanngortissinnaavaat. Taama allappoq tv2.dk.

Siriusikkormiummi Canadamiut sakkutuuisa sungiusarneranni peqataasiussanngorput.

– Nunat taakku nunanut allanut ministeriisa quiasaarutiguartarpaat. Qallunaat kissaallammik tunisarpaatigut, uagullu whiskeymik Canadian Clubimik tunisarpagut, Micael Byers, atuakkamik 'Who owns the arctic?' atuakkiortoq aviisimut The Globe and Mail Metromut oqarpoq.

Naak Tartupaluk pillugu aaqqiagiinnginneq quiasaarutaasaraluartoq, siullermeersumik qallunaat Canadamiullu piginnittuusutut sungiusaqatigiissapput.

– Takutikkusupparput nunat issittumiittugut sikup aakkiartorneranut atatillugu pisunut suleqatigiissinnaanerput, David Millar, issittumi Canadamiut sakkutuuinut naalagaasoq aviisimut oqarpoq.

Ukiuni kingullerni kissassuseq annertuumik qaffariarsimavoq. Umiarsuillu takornariartaatit amerlanerujartuinnartut Issittumut aqqut nassaarisimavaat.

Sullualik Canadap Kalaallillu Nunaata imertaata taaguutaa siunissami sikueruppat, uuliamik, gassimik, diamantinik gultimik ujaasiffittut takornariarfittullu pilerngunneqalissaaq, tamannalu Tartupaluup aaqqiagiinngissutaaneraniit annertunerungaassaaq.

Powered by Labrador CMS