Nunatta kujataani filmiliaq YouTubemi

Kalaallit nerisassaataat isinut

Nerisassaatigut pillugit aallakaatitassiaq takornarianut naatsorsuussaq minutsinik 15-inik sivisussusilik 'A Taste of Greenland' maanna nunarsuarmi internetsikkut videonik saqqummersitsivimmi YouTubemi takuneqarsinnaalerpoq. Tassani Kalaallit Nunaata kujataa takornariarfissatut taputartuunneqarpoq, Nunatsinni Takornariaqarnermut Inuussutiisarsiornermullu Siunnersuisoqatigiit (NTIS) nalunaarput.

- Piviusulikkersaarummik alutornartumik suliffeqarfik tunisassiortoq Ace & Ace peqatigalugu, naatsunngorlugu killornissaanik akuerineqarsimavugut, taamaaliornikkut Kalaallit Nunaata kujataani misigisassat immikkut ittut isiginiarneqarlutik, taama umiarsuarnut takornariartaatinut attaveqarnermullu siunnersorti Malik Milfeldt NTIS-imit oqarpoq.

- Nerisassiorneq kisimi uani sammineqanngilaq. Aallakaatitami tamakkiisumi tamanna takuneqarsinnaavoq tv-kut aallakaatinneqaqqaarpat, nangippoq.

YouTubemimi takussutissiaq naannernut marlunnut avinneqarsimavoq, tassaallutik minutsinik 9-nik 7-inillu takissusillit, tassanilu peqqutaavoq takutsivimmi filmit takissutigisinnaasaat.

- Siullermik tunisassiortut peqatigalugit takornariaqarnermut tunngatitamik minutsinik 5-10 minutsinik takissusilimmik sananiaqqaarsimagaluarpugut, inuppassuilli nalunngilaat nunatta kujataa qanoq pinnertigisoq immikkuullarillunilu, taamaattummik filmip qiortarpallaarnissaa pinaveersimatissimavarput, anersaava imminullu atasuunera peqqutigalugit, Malik Milfeldt nassuiaavoq.

Kalaallit Nunaanni Takornariaqarnermut Inuussutissarsiornermullu Siunnersuisoqatigiit siunissami akeqanngitsumik internetsikkut tuniniaaneq atornerulerniarpaat, nunarput nunatut angalaffissasut immikkuullarissutut allarluinnaasutullu tuniniarniarlugu.

Filmit naatsut marluk uani takusinnaavatit:

Imm. 1 aamma Imm 2

Powered by Labrador CMS