Asii Tasiilamut tikeraarpoq
Kulturi, inuusuttut naligiissitaanerlu sammineqassapput, borgmester Asii Chemnitz Narupip ulluni makkunani Tasiilamiinnerani.
Marsip 6-ianniit 10-annut Kommuneqarfik Sermersuup borgmesteria Asii Chemnitz Narup Tasiilamiissaaq. Tassani ilaatigut pulaassavai katersugaasivik, frimærkinut immikkoortoqarfik fritidsklubbilu, kiisalu tusartinneqassalluni atuartut angajulliit Tunumi inuusuttuuneq qanoq isumaqarfigineraat.
Borgmesterip tikeraarnermini aamma innuttaasut ualikkut kulturisioqatigissavai aliikkusersuinerpassualimmik. Tunumiut erinarsoqatigiivi aliikkusersuissapput tivasoqassalluni, oqaluttuartoqassaaq erinarsortartorlu kitaamiu Ulf Fleischer aliikkusersuissaaq.
Piffissami tamatumani Danmarkip isumaginninnermut ministerertaava Benedikte Kiærs isumagininninnermullu naalakkersuisoq Maliina Abelsen Tasiilamiissapput borgmesterillu ataatsimiinnerini arlalinni peqataasassallutik.