Biilinik misissuisoqartaqqilissaaq
Qallunaat angallannermut ministerianik nutaamik isumaqatigiissuteqarnikkut biilinik misissuisarneq peqqussutinngoqqissaaq ukiut aqqanillit "inatsisaatsuliortoqareersorlu".
Angallannikkut isumannaatsuuneq iluarseriassagunarpoq. Aamma taamaassaaq biilileriffinni suliffiit, biililerisartut biilinik atornikunik iluarsaassinermi isumannaallisaanermilu suliaqarnerulernerisigut. Nunatsinnimi biilinik misissuisarneq peqqussutinngussaaq.
Tamanna qallunaat angallannermut ministeriata Hans Christian Schmidtip (V) aamma ineqarnermut, attaveqarnermut angallannermullu naalakkersuisup Jens B. Frederiksenip ataatsimiinnerisa inerneraat.
- Danmarkimit siusinnerusukkut Kalaallit Nunaanni biilinik misissuinerup ingerlannissaa aningaasatigullu akisussaaffiginissaa akisussaaffigiumaneqanngilaq, qallunaat naalakkersuisuisa ukiut aqqanillit matuma siornagut susassaqarfik taanna namminersortunngorsarmassulli. Namminersornerlu pillugu inatsimmik isumaqatigiinniarnermi erseqqissumik allassimavoq biilinik misissuisarneq qallunaanit suli akisussaaffigineqartoq. Kiisami pissutsit aaqqippavut, Jens B. Frederisken oqarpoq.
Siunertaavoq Danmarkimi angallannermut naalakkersuisoqarfik aasartinnagu Kalaallit Nunaanni biilit misissortarnissaannut aaqqissuussinermik saqqummiussissasoq. Taassuma kingorna Jens B. Frederiksenip naatsorsuutigaa aasaanerani sulinngiffeqareernerup kinguninnguaq isumaqatigiissuteqartoqarsinnaalissasoq. Qallunaat periaasiat assilineqassappat taava ukiut marlukkaarlugit biilit misissorneqartassapput.