Issittumi angalaartup kisitsissutit uukapaatippai
Issittup uppii sumi tamani timmipput timmissanillu kisitsissutit uukapaatillugit.
2007-imi Norgep avannaani Finnmarkenimi issittup uppii pingasut tigusarineqarput qaammataasanullu nassitsissutinik ikkussivigineqarlutik. Nassitsissutit atorlugit paasineqarpoq issittumi uppik tassaasoq angalaartuartoq piffissap sivikitsup ingerlanerani isorartuupilussuakkut timmisinnaasoq. Uppiup arnavissap Albertinep akunnerit 33-it ingerlanerini 318 kilometerit timmissimavai.
Taama allappoq Politiken.
Norgemiit ilisimatuut pingasut issittup uppinik nalunaarsuisut naapertorlugit kisitsisit pissarsiarineqartut takutippaat nunarsuarmi issuttup uppiisa amerlassusaat annaarneqartarsimasoq.
Uppeqassuseq 290.000-miitinneqartarsimavoq, Norgemiilli ilisimatuut isumaqarput, timmissanik kisitseriaatsimi nalinginnaasumi timmissat ilaat arlaleriarlutigit kisinneqartarsimasut - taakkumi nerisassarsiorlutik sumorsuaq angalasarput. Ilisimatuut isumaqarput uppeqassuseq 290.000-iunani 50.000-inut qaninnerusoq. Timmiaq issittumi uumasuuvoq Skandinaviamiit Ruslandimi, Canadami Kalaallillu Nunaanni uumasuulluni.
Norgemi, Sverigemi Finlandimilu timmissat piaqqiortut amerlassusaat ukiuni amerlanerni appasippoq, ukiullu ilaanni nunani taakkunani piaqqiortoqanngivittarluni. Timmissanik misissuineq qallunaat timmissanik soqutigisallit peqatigiiffiaata atuagassiaani saqqummersussami eqqartorneqarpoq.