Smasherpassuit piareerfigaat
Arctic Winter Gamesimi sulorarnermi unammiuaarnerit ataasinngornermi aallartissapput. Nuna tamakkerlugu sungiusaasup Bjarne Nielsenip naatsorsuutigaa nunarput sinnerlugu peqataasut tamarmik ujaminnakkumaartut.
Sulorarnermi nunarput sinnerlugu Arctic Winter Gamesimi peqataasussat unamminerpassuit aqqusaartussanngorpaat. Taamaattumik sungiusarneq aaqqissuunneqarsimavoq smasherpassuit aqqusaaqqaarlugit ujammit pissarsiarinissaannut naleqqussarlugu.
– Siornatigut AWG-qataasarnitsinnit nalunngilarput kalaallit peqataasussat unamminerpassuit aqqusaaqqaartussaagaat, tamannalu sapinngisamik pitsaanerpaamik piareersarfiginiarsimavarput. Unammisartut sungiusaraangamik tamatigut ikinnerpaamik 80-eriarlutik smash-erisartussaapput, taamaasillutik taleq atugartik sungiussitinniassagamikku, taama nuna tamakkerlugu sungiusaasoq Bjarne Nielsen oqarpoq.
– Pointit ajornanngitsut pissarsiarinissaat aamma piareersarfigaarput - aallartitseriallaqqikkaanni tamakku pissarsiarineqarsinnaalluarput. Aamma arsartut nassuiaateqqisaarsimavakka qasujaallisarluassasut, tamannalu ingerlatissagaat interval-it atorlugit arpannikkut aammalu unammiffimmi nissut atorluarnissaannut taamaasillutik unamminerpassuarnut piaareersimaniassammata
– Februaarip qaammataani illoqarfinni sumiiffinnilu unamminerit ingerlanneqartarsimapput taamaasilluta aamma ajugaarusussuseqarluta piaareersimavugut, taama oqarpoq Bjarne Nielsen ilimasuttut kalaallit sulorarnermi peqataasut tamarmik ujaminnakkumaartut
Aajuku nunarput sinnerlugu sulorarnermi unammeqataasussat:
U16
Sara Lindskov Jacobsen B67
Hedvig Broberg SPQ
Niels Thorleifsen JBF
Nikki Løvstrøm Mathiesen JBF
U19
Rina Lorentzen B67
Malu Poulsen Degn JBF
Sequssuna Fleischer Schmidt B67
Nikki Nathansen TEN