Nuup eqqaani nanoqanngilaq
Nuummi piniarnermut nakkutiliisut upperinngilaat ippassaq Nuummi nanoqarsimasoq, Qinngutsinnilu nanoqarneranik tusakkat Facebookimit aallartissimassasut.
Nuummi piniarnermut nakkutilliisut ippassaq ualikkut qulimiguulik atorlugu nanoqarnersoq misissorsimavaat, nanoqanngilarli.
- Pinngortitaleriffik suleqatigalugu Nuup eqqaani tuttoqarneranik kisitsivugut, ippassarlu ualilluarneratigut angerlamut uternitsinni Qinngorput qulaavaarlugu nanoqarnersoq misissoraluarparput, takusaqangilagulli, piniarnermi nakkutilliisoq Magnus Petersen oqarpoq.
Pingasungormat ualikkut nanoq Nuummi aalassatsitseqaaq, tusakkat naapertorlugit Qinngutsinni nannumik takusoqarsimammat. Kikkut tamarmik biilillit Qinngutta tungaanut biilerput nanoq takuniarlugu, arlalissuillu umiatsiamik aamma ujaasipput.
Kisianni takuneqanngilaq, aamma nannup tumaanik soqanngilaq.
- Isumaqarpunga nanusiorneq nappaatigineqalersimasoq, tusakkallu Facebookimi aallartissimassasut, soorlu inuit ilaat taama oqartut, Magnus Petersen illarluni oqarpoq.