Sermitsiap isumaa: Piviusorpalaartumik takutitsivik imaluunniit sulffissuaqarnikkut ineriartorneq
Itsarnitsanik tammatsaaliuissaagut imaluunniit suliffissuaqarnikkut ineriartussaagut? Apeqqut taanna tusarniaassutigineqarnikuuvoq aammalu kulturikkut kingornussanik tammatsaaliuiarnissamut inatsisisatut siunnersuut inarsisartut oqaluuserilerpassukoqaluuserineqartussaalluni. Inatsissatut siunnersuut malillugu Naalakkersuisut kulturikkut kingornussanik eqqissisimatitsinissaq allatulluunniit illersuinissaq pinngitsoortissinnaavaat, naalakkersuisullu aamma eqqissisimatitsinernik illersuinernilluunniit pioreersunikallanngortitsisinnaassallutik atorunnaarsitsisinnaassallutilluunniit. Inuiaqatigiit ineriartornissaannut tunngasut peqqutigalugitnaalakkersuisut eqqissisimatitsilernissaagaluanik kulturikkulluunniit kingornussanik immikkut ittumik illersuinernik atorunnaarsitsisinnaapput.
Maniitsup eqqaani erngup nukinganit nukissiorfittalimmik aluminiuliorfiliortoqassappat inuiaqatigiinni atukkat allanngorujussuartussaapput tassanilu aamma inatsit taanna atorneqartussaassaaq. Tassani pineqarpoq Kalaallit Nunaanni tatsit annersaat Tasersiaq Maniitsup Sisimiullu akornanniittoq Tasartuullu Tasersua Maniitsup Nuullu akornanniittoq. Alcoap taakku 2007-imiilli Nunatta Katersugaasivianut Allagaateqarfianullu misissortissimavai, taannalu nalunaarusiorsimavoq Tasersiap eqqaa kulturikkut oqaluttuarisaanermut pingaarutilerujussuunerarlugu, kulturikkullu oqaluttuarisaanermut pingaarutilinnik arlalinnik nassaarfiusimanerarlugu, taamalu UNESCOp silarsuarmi kingornussanik allattuiffianut ilanngunneqarnissaa inassutigalugu.
Eqqissisimatitsisoqassatillugu Nationalmuseet aalajangiisuusarpoq. Ilaagullu tamanna pissutigalugu Naalakkersuisut kissaatigaat, inuiaqatigiit ineriartornerannut tunngasut ilanngullugit eqqarsaatigineqassatillugit eqqissisimatitsinissanut tunngasut aamma politikikkut oqaluuserineqartassasut. Taamaattumillu imaappoq, politikerit isumaqarput pissutsinik allanik kulturikkut oqaluttuarisaanermiit pingaarnerutitsisoqartariaqartillugu Nationalmuseet aalangiisuutinngitsoorneqartassanersoq. Alcoa inuussutissarsiornikkullu suliffeqarfissuit allat soorlu aatsitassarsiorfiit, nukissiorfeqarfiit assigisaallu nunatsinni pilersitsinissaminnut periarfissaqalermata inatsit taanna annerujussuarmik sunniuteqartussanngoriasaarpoq. Naalakkersuisut eqqissisimatitsinermik unitsitsisinnaanerannut tunngaviusinnaasut tassaapput inuiaqatigiit ataavartumik nukissiuuteqanissaannik kissaateqarneq.
Inuiaqatigiit pinngortitami ajunaarnersuup kingunerisaanut illersorneqarnissaannik kissaateqarneq inuussutissarsiornikkut suliffeqarfiit inuiaqatigiinnut annertuumik iluaqutaasussamik sumiiffimmilu allami pilersinneqarsinnaanngitsumik allilerneqarnissaannik pilersitsisoqarnissaanilluunniit kissaateqarneq. Inuiaatigiit nutaanik isertitaqalernissaat suliffissanillu nutaanik pilersitsisoqarnissaa eqqarsaatigalugit suliffissuaqarnikkut inerisaasoqalernissaa massakkut kikkut tamarmik utaqqiinnarpaat aalisakkanik suliffissuit ukiuni kingullerni annaaneqarsimasut nungukkaluttuinnartullu allanik taarserneqartariaqarmata. Suliffiit inuussutissarsiutillu tamakkua inerisarneqarsinnaanera silap pissusaasa allanngoriartornerat ilutigalugu ajorsarsiartuinnarpoq.
Maniitsumi nutaamik ineriartortoqarnissaa utaqqisinnaajunnaaraluttuinnarpaat. Kujataani, Avannaani Tunumilu nutaamik aatsitassarsiortoqarnissaa kissaatigineqarpoq. Siunissami aningaasatigut isumannaatsuunissarput eqqarsaatigalugu pinngitsoorata ineriartortariaqarpugt tamannalu itsarnitsanik tammatsaaliuinermiit pingaarneruvoq. Inatsisissatut siunnersuummi erseqqilluinnartumik piumasarineqarpoq, itsarnitsat suliffissuarnik nutaanik pilersitsinikkut tammartussat uppernarsarneqarlutillu sumiiffimmut allamut nuunneqartassasut. Tamannali aamma nalorninaateqarpoq, mianersuutigissagatsigumi ineriartornerup aqqani sumut killissanerluta.
Tunumi aatsitassarsiortoqalissappat taavani timmissanik eqqissisimatitsiviit qanoq pissavagut? Aammalumi Kujataa, nunalerineq takornariaqarnerlu qularnaassagutsigit, imaluunniit aatsitassarsiorfissuarmik nutaamik saniatigut uranimik ilanngussisoortartussamik pilersitsissaagut? Iluassagalurpoq Naalakkersuisut oqarfigisinnaappatigut ineriartornerup aqqani sumut killissanersugut.
Massakkorpiarli ineriartornermik pilersitsinissaq piviusorpalaartumik takutitsisarfiunermiit pingaarneruvoq. Alcoap pilersitassaa innaallagissiorfittassaalu, inuiaqatigiit sinnerinut aamma iluaqutaasussat inissaqartittariaqarpagut.