Issittumi atuagaateqarfiup ataannarnissaa qulakkeerneqarpoq
Ilisimatusarnermut Nutaaliornermullu Aqutsisoqarfmmi aaqqissuussaanikkut allanngortiterinermut atatillugu 2009-mi Dansk Polarcenter atorunnaarsinneqarpoq. Maannakkullu issittumi atuagaatit Københavnip Universitetianit tiguneqarput.
Ilisimatusarnermut Nutaaliornermullu Aqutsisoqarfimmi aaqqissuussaanikkut allanngortiterisoqarmat 2009-mi Dansk Polarcenter atorunnaarsinneqarpoq. Dansk Polarcenterip suliassaat sulisuilu Ilisimatusarnermut Nutaaliornermullu Aqutsisoqarfimmi immikkoortortanut allanut ilanngunneqarput, issittumilu atuagaatit siunissaat nalorninarsilluni, nanoq.gl allappoq.
Ilisimatuut qallunaat nunanillu allaneersut 100-niit amerlanerit tamanna pillugu ilisimatusarnermut miniterimut Helge sanderimut Folketingillu Grønlandsudvalgianut saaffiginnipput, Issittumi atuaateqarfiup taassumalu Kalaallit Nunaanni pissutsit takussutissaasa katersugaataasa ataannarnissaannik kaammattuillutik.
Taamatut suliniuteqarneq Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisumit Mimi Karlsenimit taperserneqarpoq, Helge sanerimut allakkami innersuussutigalugu Issittumi atuagaatit, Arktisk Institut aamma Københavns Universitetimi Eskimologimi immikkoortortat Nordatlantens Bryggemi Strandgademiittumiissimasut qularnaarneqassasut, taamaalilluni issittumi avatangiisit pilersinnissaannik ataannernissaannillu siunertaqarneq attanneqarluni.
Tamanna Københavns Universitetip Ilisimatusarnermut Nutaaliornermullu Aqutsisoqarfiup isumaqatigiinnerannik kinguneqarpoq, Issittumilu atuagaateqarfiup ingerlanneqarnera januaarip aallaqqaataani 2010-mi Københavns Universitetimit tiguneqarluni.
Issittumi atuagaateqarfik Københavns Universitetbibliotekip ilagilissavaa. Aqutsineq Eskimilogimi Issittumilu ilisimatusarnermi immikkoortortap aqutsisuata, Københavns Universitetip kiisalu Issittumi atugaateqarfiup bibliotekarianit ingerlaneqassaaq.
Ilisimatusarnermut Nutaaliornermullu Aqutsisoqarfik siunissami ukiumut 2,3 mio. kroninik aningaasaliisalissaat kiisalu Arktisk Institutimut ataasiartumik 200.000 kroninik tapiissalluni. Taamaaliornikkut Arktisk Institut, Eskimologimi Issittumilu ilisimatusarnermi immikkortortaq Københavnillu Univertitet Strandgademiiginnassapput.
Issittumi atuagaateqarfimmiipput atuakkat katersat Eskimologimi Issittumilu ilisimatusarnermi immikkortortameersut kiisalu Arktisk Institutimiit, tassanilu qulequttat tassaapput humaniora, inuiaqatiilerinarmi ilisimatusarneq pinngortitalerinerlu. Atugaateqarfimmiipput atuakkaat immikkoortut 35.000 missaat, ilaatigut atuakkat, naqitat mikinerit atuagassiallu.