Nuna tamakkerlugu katersuiniarneq naammassivoq
Kalaallit Røde Korsiata Haitimi nunap sajunnerani eqqugaasunut nuna tamakkerlugu katersuiniarnera naammassivoq. Katersuiniarnermi 1 million kronit sinnerlugit isertinneqarput.
Tele Greenland aamma Kalaallit Nunaanni Brugseni januaarip qiteqquneraniilli suliffeqarfiit taakku marluk katersuiniarlutik ingerlataanni isertitat naatsorsorneqarsimalerput.
Tele Greenland nunap sajutsiarneranili oqarasuaat aqqutigalugu katersuiniarnermik pilersitsivoq, inuit sianerlutik aningaasanik ikisiffigisinnaasaanik, siullermeertumillu sms-erluni aamma ikisisoqarsinnaalerluni.
Periarfissaq taanna innuttaasut ilarujussuannit atorneqarsimavoq, Kalaallit Røde Korsianni allaffimmik pisortaq Kirsten Mortensen nalunaarpoq.
Oqarasuaat atorlugu katersuinermi katersorneqarsimapput 125.000 kronit, sms-ilu aqqutigalugu 9.650 kronit katersorneqarlutik. Aningaasat pingasunngornermi ualikkut KRK-mut tunniunneqassapput.
Brugsen
Januaarip 25-ianiilli Brugsenimi pisisartut 30 kroninik tunisillutik Haitimi nunap sajunnerani eqqugaasunut karsimi akiliilernermi tunissuteqarsinnaapput.
Katersuiniarneq februaarip 28-ani unitsinneqartoq 34.920 kroninik isertitsiffiuvoq, taakkulu pisortamit Olav Thomsenimit Kalaallit Røde Korsiani siulittaasumut Tove Blidorfimut tunniunneqarput.
Aningaasat katersorneqartut ilaatigut nerisassanut, imermut minguitsumut, nakorsaatinut, tupernut, qipinnut Haitimilu iluarsaaseqqinnermut atorneqassapput, ussassaarinermi pisortaq Ulla Arlbjørn oqarpoq.
KNB KNR-imi aallakaatitaq Pulaarfik aqqutigalugu 10.000 kroninik tunissuteqareersimavoq.
Kalaallit Røde Korsiata katersai marsip 3-anni amerlassuseqarput 1.021.109 kroner.