Betoni PCB-mik akulik Danmarkimut nassiunneqarpoq

Namminersorlutik Oqartussat PCB-mik akullit isumannaatsumik passussimanngilaat, sanaartukkanillu eqqagassat PCB-mik akullit sanaartukkani allani atoqqissimallugit, Jens B. Frederiksen oqarpoq.

Betonit taamarmik PCB-mik Blok Q-mit piiarneqartut Danmarkimut nassiunneqarput Kommunekemimi aserortigassanngorlugit, taama nalunaarpoq Naalakkersuisunut ilaasortaq Jens B. Frederiksen tusagassiuutitigut nalunaarummi. Assi: Leiff Josefsen.

Ineqarnermut, Attaveqarnermut Angallannermullu Naalakkersuisoq Jens B. Frederiksen nalunaarpoq, Blok Q-p isaternerani betoni PCB-mik akulik Danmarkimut nassiunneqarsimasoq Kommunekemi aserortigassanngorlugu.

Pineqartoq tassaavoq sanaartukkanit eqqagassat PCB-mik akullit 649 tonsit, taakkulu toqqortaatiginerannut assartornerannullu Namminersorlutik Oqartussat 3.238.436 kroninik aningaasartuuteqarsimasut.

Jens B. Frederiksenip nalunaarutigaa, Blok Q-p isaternerani betonimik immikkortut, qalipaammik PCB-limmik qalipanneqarsimasut, immikkoortinneqarsimasut, tassaallunillu inissiarsuit saqqaaniittut konsollit, aneerasaartarfinnut pladit talullu.

- Betonimik immikoortut immikkut piiarneqarput Kommunekeminullu aserortigassanngorlugit nassiunneqarlutik.

Sanaartukkanit eqqagassat allat Blok Q-p isatinnginnerani PCB-millu ajornartorsiutut ilisimaneqanngikkallarmata Nuullu eqqaani qeqertaaqqat eqqaanut kiversarneqarlutik, maannakkut Nunami Namminermi avatangiisinut pinngortitamullu Naalakkersuisoqarfimmiit suneqassanersut misissorneqassapput.

- Taamaattumik internetsikkut aviisimi Sermitsiaq/AG allaaserisaq 'Blok Q Sanap eqqaanut iginneqartoq' marsipp 10-ani 2010-mi paatsoorneqarsinnaavoq, Qulequttamut naatsumik oqaasertalerlugu allassimavoq 'Annniarsiorfimmi apriilip 9-ani uku assit assilisaapput. Tassani takuneqarsinnaavoq blok Q-miit eqqagassat SDIH-mi inissianut napasulianut marlunnuut toqqammavissatut atorneqartut'. Allaaserisamit naatsumit innersuunneqarpoq allaaserisaq 'Eqqakkat toqunartullit immamut iginneqartut'.

-Taanna ima paasineqarsinnaavoq, betoni DIH-mi toqqavissatut atoqqinneqartoq Blok Q-meersuusoq, toqunartulillu. Taamatut paasinnittoqarnera allaaserisaq pillugu oqaaseqaatinit takuneqrsinnaavoq.

- Uggornarpoq Sermitsiaq/AG aamma Qanorooq isumaqalersitsimmata,Namminersorlutik Oqartussat eqqagassat PCB-mik akullit piaaralutik mianersuaalliorlutillu sanaartugassani allani atoqqissimagaat. Tamanna eqqunngilluinnarpoq, Jens B. Frederiksen oqarpoq.

Powered by Labrador CMS