Arnaq suli maaniippoq

Arnaq 63-inik ukiulik angerlarsimaffeqanngitsoq aalakoortorujussuaq, marlunngormat unnukkut tamanit imminiiginnarneqartoq suli Sisimiuni Sømandshjemmimi najugaqarpoq.

Erik Lomholt-Bek-ip isumaginnittoqarfik, peqqinnissaqarfik politiillu aperisimavai taamatut pisoqqissagaluarpat qanoq pisoqassanersoq. Ass.: Marianne Langvardt.

– Sapaatit akunnerini pingasuni sumik susoqanngikkaluarpat immaqa sukataarnerulluta qanoq iliuuseqassagaluarpugut, isumaginnittoqarfilli arnap najugaqarfissaanik nassaarsimannguatsiarpoq, Sømandshjemmip ittua Martin Faldt oqarpoq.

Arnaq aalakoortorujussuulluni ilisimanani Sisimiuni Unnuisarfiup silataani aputaannarmiittoq marlunngormat unnuakkut nassaarineqarmat pisortat assigiinngitsut allallu tigujumanagu assortuutilerput.

Unnuisarfimmillu piginnittup Erik Lomholt-Bek-ip arnaq Sømandshjemmimukaappaa, tassani døgni kaajalallugu pigaartoqartarmat, arnarlu suli tassaniippoq.

– Arnaq tigummiinnarallarsinnaavarput. Maniinnerali isumaginnittoqarfiup akilerumanikuuaa, Martin Faldt oqarpoq.

– Arnaq iniutitta mikinerit arlaanniippoq - iluamik pequsersugaanngitsumi, maanilu nerisarpoq. Maaniinnera døgnimut 660 kroneqartarpoq, oqarpoq.

Arnaq marlunngormamiilli Sømandshjemmimi pitsaasumik siniffissaqalersimasoq aamma isumannanngilaq, atisai ipertuut errorneqarsimapput, nerisarpoq aalakoornartoqanngitsunillu imigaqarluni, ullormullu pingsoriarluni nerisarpoq.

– Peqqissiallattorujussuunikuuvoq, akuliuppiartanngilarli, Martin Faldt oqarpoq.

Arnaq 63-nik ukiulik Sermitsiamut oqaaseqarumanngikkallarpoq.

Powered by Labrador CMS