Pillagaasimanini isertuutinngilaa
Paamiuni atorfinitsinnani qullersaasunut meeqqamik atoqateqarnini peqqutigalugu pineqaatissinneqarsimanini oqaatigaa.
- Kalaallit Nunaanni atorfininninni pillagaasimanera isertuutinngilara, inuuninnilu qanoq pisoqarsimaneranik msissuisinnaanerat atsiorlugu. Suliffiga nuannaraara, napparsimasullu kajumissaarpaannga aggeqqeqqullunga ataavartumillu atorfinillunga.
Taama oqarpoq 56-inik ukiulik Kim Plaschke, nakorsaq - meeqqanillu atoqateqartartoq, ajornaquteqanngitsumik meeqqanut inersimasunullu nakorsatut atorfinittoq, siorna aasakkut meeqqamik atoqateqarsimanerminut tunngatillugu ukioq ataaseq parnaarussaanissamik pineqaatissinneqartoq, Ekstra Bladet allappoq.
- Dronning Ingridip napparsimavissuani peqqinnissaqarfimmiit nunap immikkoortuani nakorsamut ikiortitut Paamiuni qaammatini pingasuni taartitut atorfinippoq. Atorfeqarnermi sivitsornissaanut qinnuteqarpoq, tamannali itigartipparput. Piffissammi ingerlanerani qanga pisimasut paasivagut, peqqinnissaqarfimmi sulisoqarnermut pisortaq Mogens Bentsen oqarpoq.
Allaaserisami nalunaarutigineqanngilaq peqqinnissaqarfimmiit Kim Plaschkep ileqqorisai qanoq ililluni paasineqarsimanersut. Mogens Bentsenili naapertorlugu Paamiuni napparsimasut meeqqat inersimasulluunniit akornanni kanngutsaatsuliortoqarsimaneranik nalunaartoqanngilaq. Maannakkut siusinnerusukkullu Kim Plaschke meeqqanik atoqateqartartutut pinngitsuunerarpoq, illoqarfiup eqqartuussiviani Østre Landsretimilu 2008-mi Næstvedimi illumi eqqaani najugalimmik niviarsiarannguamik ukiuni tallimani atoqateqarsimasutut eqqartuunneqarnermini. Atoqateqartarnerit 1994-imi aallartipput niviarsiaraq quliinnarnik ukioqartoq, aatsaalli inersimasunngorami susoqarsimaneranik oqaluttuarluni.