Kalaallit Nunaanni kelterit aavat
Vikingit tassaanngillat kisimik Kalaallit Nunaanni inuunissamik misiliisimasut.
Vikingit Norgemiit aallarlutik Kalaallit Nunaata kujataani naggorissumi nunasinerannik assiliaq allanngussagunarpoq. Kalaallit Nunaata kujataaniit ilisimatusarnikkut misissuinerit nutaat takutippaat, vikingit taamaallaat nunanit avannarlermiut aavannik aaqartut, kelterillu aavannik Tuluit Nunaanneersimagunartunik akoqarluni, Videnskab.dk allappoq.
Qallunaat qanganisarsiuut maannakkorpiaq Kalaallit Nunaata kujataani qallunaatsiaat najugaqarsimasut pillugit misissuleruttorput - ukioq 985-miit najugaqartut. Oqaluffitoqqap iliveqarfittaani inuppassuit ataatsimut ilerri ukioq 1000-meersuugunartut nassaaraat, tassanngalu DNA-mik misissuinermit paasineqarpoq qanga Kalaallit Nunaanni najugaqartut kelterinik akoqarsimasut.
- Ilisimatusarnerup inerneri suli saqqummersinneqanngillat, inernerigallartulli tupaallannartumik takutippaat, inuit iliveqarfimmiittut vikingiunermiit kelteriunerusut, Jette Arneborg Naalagaaffiup katersugaasivissuani pisortaq ilisimatoorlu oqaluttuarpoq, qallunaat qanganisarsiuut suliami tassani peqatasut ilaat.
- Ilisimajuarparput qallunaatsiaat annertuumik angalasartut, aamma nalunngilarput Savalimmiuni Islandimilu najugaqaqqaartut kelterinik akusaasut, aammali tamanna Kalaallit Nunaanni takuarput, Jette Arnborg oqarpoq.
Savalimmiuni Islandimilu maannakkut inuusut misissornerani paasineqarpoq, ingammik arnat kelteriusut, tassuunaatigullu takuneqarsinnaavoq, vikingit Norgimeersut angalanerminni Tuluit Nunaat aqqusaartarsimagaat - tassannga arnanik tigusillutik - Atlantikullu avannaanut Savalimmiunut, Islandimut Kalaallillu Nunaannu ingerlaqqillutik.