Ukiup arferi kitaani sikulimmiikkusunnerupput
Ukioq manna Kalaallit Nunaata kitaani aatsaat taama sikoqanngitsiginera peqqutigalugu pinniartut qilakukkanik qaqortunik, qernertanik imaluunniit arfivinnik siumugassaqanngillat.
Ukiuni 17-ini aaqqissuussamik kisitsinerit takutippaat, arferit sikup killiffiata avannarpariartornerat malersortaraat, tamannalu ukioq manna piniartut arfernik siumugaqannginnerannut peqqutaavoq, natur.gl allappoq.
Polar Researchimi allaaserisami Pingortitaleriffimmi biologit nassuiarpaat, qilalukkat qaqortat ukiuunerani sumiiffiannut sikup qanoq pissuseqarnera aalajangiisuusartoq.
Kalaallit Nunaata kitaani qilakukkat qaqortat ukiuunerani marlassusaat aaqqissuussamik 1981-miit 2008-mut quleriarluni timmisartorluni kisinneqarsimapput. Timmisartukkut kisitsinerit aamma takutippaat arferit sumiittarnersut. Arferit sumiiffigisaat sinerissap sikuanut naleqqiukkaanni takuneqarsinnaavoq arferit sineriak sikoqartillugu najoqumanerusaraat.
Ukiuunerani sikukitsillugu arferit kimmut ikkannersanut ingerlasarput, ikkannersat qeqqata nalaaniittarlutik kimmullu killingani.
Ukiuunerani nunatta kitaani tamanna qilalukkat qaqortat amerlassusaannut naleqqiukkaanni ersarippoq, ukiumi sikorarnerutillugu pisartoqarnerusartoq, tassalu arferit nunanut piniartunut qaninnerutillugit.
Tamanna aamma nunatta kitaani ukiuni kingullerni qilalukkanik qaqortanik pisarnikinnerunermut nassuiaatissaavoq, tassalu sikukinneruneratigut.
Qilalukkanik qaqortanik peqassutsimut pitsaasumik sunniuteqarsimavoq pisat ikilisimanerat, amerliartulernerannillu isikkoqarpoq maannakkut 10.500 missaaniillutik.
- Ukioq manna nunatta kitaani aatsaat taama sikukitsigaaq, tamannalu piniartuni maalaarutigineqarpoq, qilalukkanimmi qaqortanik qernertunilluunniit imaluunniit arfivinnik siumugassaqanngilaq. Timmisartukkut kisitsinikkut paasisat nutaat tunngavigalugit ilisimalerpavut, ukiuni nunatta kitaani sikup pissussaa arferit malittaraat, tamannalu piniartut takusaqannginnerannut peqqutaavoq, natur.gl allappoq.