Tønnes Berthelsen AP-p allattoqarfiani pisortangorpoq
Aalisariutaatillit peqatigiiffianiit AP apriilip aallaqqaataani 2010-mi Qeqqata Kommuniani inuussutissarsiornermut pisortaq Tønnes Berthelsen allaffimmi pisortatut atorfinitsinneqarpoq.
Sinerissami Qanittumi Avataanilu Aalisariutaatillit Peqatigiiffiat, AP, ataasinngormat marsip 15-ani Hotel Hans Egedemi ataatsimeersuarpoq, apriilillu aallaqqataaniit Tønes Berthelsen peqatigiiffiup allattoqarfiani pisortatut atorfinitsillugu.
Tønnes Berthelsen siorna tikillugu Arctic Green Foodimi pisortaavoq, Qeqqatalu Komuniani Inuussutissarsiornermut Siunnersuisoqatigiinni atorfeqarsimalluni. Periusissanik pilersaarusiornermi aqutsinermilu cand. mercivoq Leeds Universitymit nunat tamat akornanni niuernermi MBA-mi ilinniarsimalluni.
Ataatsimeersuarnermi siulersuisut qinigaaqqipput tassaallutillu:
Siulittaasoq Peter Olsen siulersuisunullu ilaasortat Anda Dalager, Jørgen Eriksen, Anders Brøns aamma Paaviaaraq Heilmann.
Ataatsimeersuarnermi anguniagassat makku siunissami sulinissami akuersissutigineqarput:
? Naalakkersuisut aalisarneq pillugu siunnersuisoqatigiianni ilaasortaalernissaq (AP tassaavoq nunatsinni aalisarnermut kattufiit annersaat, ilaasortallu akornanni aalisarnermut pissutsinik annertuumik ilisisaqartoqalersimaluni. Taamaattumik aalisarnermut siunnersuisoqatigiinni ilaasortaanissaq pisariaqarpoq.)
? Aalisarnermut isumalioqatigiissitap innersuussutaasa piviusunngortinnissaannut sukumiisumik sulinissaq.
? Sulissutigissallugu MSC-mi uppernarsaatinik suliaqanermi suleqatasunut tamanut erseqqissassallugu, raajanik avammut tuniniaanitsinni tamanna pingaarluinnartuusoq, suliallu ingerlanera pimorullugu suliarineqartariaqartoq.