Sparbankip ilaa Savalimmiormiut pisiaraat
Sparbankip nunatsinni immikkoortortai Danmarkilu immikkoortortat arlallit Føroya Bankip pisiarai.
Føroya Bank nunatsinni Danmarkimilu aningaaseriveqarnermut ilannguppoq. Savalimmiormiut qangali kissaatigiuarsimavaat nunamik avataanut siaruarnissaq.
– Danmarkimi aningaaserivileqalernissarput piffissami sivisujaani anguniarsimavarput, Sparbankillu immikkoortortamik ingerlalluartut tuniniarnissaannik kissaateqarnerat periarfissatsialaavoq, Føroya Bankimi pisortaq Janus Petersen oqarpoq.
Pisortap Kalaallit Nunaat Føroyja Bankimut niuerfissaalluartutut nalilerpaa.
– Kalaallit Nunaat aningaaserivitsinnut niuerfissaalluarpoq, Savalimmiunilu Kalaallilu Nunaanni inuussutissarsiornikkut qanittumik niueqatigiinneq ingerlajuarsimavoq, tusagassiuutitigut nalunaarummi Janus Petersen oqarpoq.
Katillugit aqqaneq marlunnik immikkoortortaqarpoq 30.000-inik sullitaqarluni 136-nillu sulisoqarluni.
– Immikkoortortani tunilikkatsinni sulisorpassuit pikkorissut sullitallu inuulluaqqunissaat soorunami nuanniippoq, nuannaarutigaarpulli pisisinnaasumik pissarsigatta immikkoortortani taakkunani periarfissanik takunnissinnaasunik, sulisullu piffissaq sivisooq isigalugu sulisitsisoqalissallutik, sullitallu patajaatsumik aningaaseriveqartuassallutik, Sparbankimi pisortaaq Henning Hürdum oqarpoq.