G7: Puisip neqaanik nererusunngitsut
Nunat pisuut peqatigiiffianni G7-imi aningaasaqarnermut ministerit Nunavummi nerersuaqatigiinnissamut takkutinngillat, puisip neqitortoqartussaammat.
Nunarsuarmi nunat pisoorsuit aqutsisuisa puisinniarnermik paasinninnerunissaannik Canadamiut Nunavummiullu angusaqanngitsoorput.
Nunat G7-it Nunavuup illoqarfiisa pingaarnersaanni Iqalunni ataatsimeersuarnerannut naggataarutigalugu qaaqqusisoq, Canadami ministeriuneq Jim Flaherty, puisitorluni nerersuaqatigiinnissamik qaaqqusigaluarpoq.
Puisitornissarlu orniginagu Flahertip peqatai arfinillit neriartunngillat, knr.gl allappoq.
Tysklandimi, Frankrigimi, Italiami Tuluillu Nunaanni aningaasaqarnermut ministerit aningaasevinnillu aqutsisut nalunaaruteqarput puisip neqitornissartik kissaatiginnginamikku neriartorniaratik. USA-miit Japanimillu ministerit takkutinngillat.
Takkuttutuaapput Canadami aningaasaqarnermut ministeri Canadamilu Nationalbankip pisortaa.
Nerersuaqatigiinnissami taamaallat puisip neqaa pineqanngilaq. Issiaviit aningaasaqarnermut ministerit issiavissaat puisip amianik qalligaapput.
Ministerit puisip amianik aaqanngitsunik aaqatinillu tunissutisisussaagaluarput. Saqisullu puisip amianik qaaquteqartussaallutik.