Utaqqisut ikinnerulissapput
Islandip Danmarkillu millionilikkaanik naleqartumik isumaqatigiissuteqarfiginerisigut suliaritinnissamut utaqqisut 300-nik ikinnerulissapput.
Islandimik, Arresødal Privathospitalimik Frederiksværkimittumik kiisalu Københavnimi Øjenlægernes Husimik Peqqinnissaqarfiup nutaamikisumaqatigiissuteqarnerat kinguneqarluarunarpoq.
Peqqinnissaqarfiup ilimagaa suliaritinniarlutik utaqqisut katillugit napparsimasunik 311-nik ikilissasut. Tassani pineqarput quertimut (grå stær), siutimikkut seeqqumikkullu suliaritinniartut.
Isumaqatigiissutit pilersinneqarsinaapput ukiarmi utaqqisut immikkut ittumik ikilisarnissaanut aningaasanut inatsisikkut 7,5 milioner koruninik aningaasaliisoqarneratigut.
Massakkorpiat utaqqisut qassiunersut ilisimaneqanngilaq, ukiulli ataatsip matuma siorna utaqqisut 892-iupput.
ALLAASERISAQ ATUARUK: Utaqqinini pillugu innarluuteqalersoq
Avataaniit suleqateqalernerit saniatigut seeqqumikkut tuimikkullu suliaritinniarlutik utaqqisut 36-t immikkut ittumik ikilisarniarlugit peqqinnissaqarfimmiit pilaasartunik avatanneersuniit sapaatip akunnerani 8-mi 9-milu pilaasussanik isumaqatigiissuteqarput. Tamanna Ilulissani pissaaq.
Suliniutit iluarineqarluarnerat naalakkersuisut tupaallaatiginngilaat.
– Suliaritinniarlutik utaqqisut ikilisussanngormata iluarisimaaqaara. Utaqqisut ikilisarnissaat naalakkersuisuni pingaartipparput. Inuiaqatigiinnut innuttaasunullu iluaqutaasinnaanngilaq inuit suliaritinnissaminnik ukiorpassuarni utaqqisarnerat sulisinnaassutsiminnik inuunermillu pitsaassusaannik annaasaqaatigisaminnik, peqqissutsimut naalakkersuisoq Agathe Fontain, IA, tusagassiuutitigut nalunaarummi oqarpoq.