Illoqarfinni suliffissaaleqineq annertusiartorpoq

Siorna suliffissaaleqineq qaffariarsimavoq. Tamannali aamma peqquteqarpoq sulisinnaasut amerlisimanerannik, naatsorsuutit kingulliit takutippaat.

Ukiuni arlalinni suliffissaaleqineq appariartorsimariarluni qaffariartoqqilerpoq. Assi: Polfoto/Lasse Kristensen

2009-mi 4,6 procentimut qaffariarpoq ukiup siuliani 4,0 procentiusimalluni, taama Kalaaallit Nunaanni naatsorsueqqissaartarfiup kisitsisaataanni erserpoq.

Nuuk suliffissaaleqiffiunnginnerpaavoq, suliffissaaleqisut sulisinnaasut 1,7 procenteralugit.

Kangaatsiaq suliffissaaleqiffiunerpaavoq.

Sulisinnaasunut naleqqiullugit suliffissaaleqineq 8,0 procentpointinik qaffariarsimavoq tassaallunilu sulisinnaasut 17,2 procentiat.

Tassani aalisakkanik tulaassuineq unitsinneqarsimavoq suliffissuarlu matuneqarluni, sulisullu angerlartiinnarneqartut suliffissarsiuussisarfimmi suliffissarsiortutut nalunaarsimallutik, Kalaallit Nunaanni Naatsorsueqqissaartarfik allappoq.

Ukiup siulianut naleqqiullugu sulisinnaasut 412-inik amerleriarsimapput, 2009-milu 28.490-ullutik.

Suliffissaaleqinerup qaffarianneranut ilaatigut peqqutaavoq 2008 naatsorsuutinut peqataanngimmat, kiisalu suliffissarsiortut ukiui 2008-mut naleqqiullugit qaffanneqarsimammata 15-62-iniit 15-63-inut.

Kommunerujussuarni Kommuni Kujalleq suliffissaaleqiffiunerpaavoq, suliffissaaleqisut 13,6 procentiugamik. Illoqarfinni Qaasuitsup Kommunianiittoq Kangaatsiaq suliffissaaleqiffiunerpaavoq 30,5 procentiugami.

Powered by Labrador CMS