Danmarkimi atisanik takutitsinermi puisit amii
Danmarkimi mutit sapaatip akunnerat aallartippat Great Greenland peqataassaaq.
Atisanik nutaaliorneq uninngatereerlugu Namminersorlutik Oqartussat puisit amiinut suliffeqarfiutaat Great Greenland saqqummeqqippoq.
Great Greenland takutitsivimmi Copenhagen Fashion Fair, CPH Vision, februaarip 11-aniit 14-anut 2010 ingerlasussami takutitsiveqarpoq, Københavnimi ulluinnarni 09.00-miit 20.00-mut Øxnehallernemi ingerlanneqartumi, suliffeqarfik tusagassiuutitigut nalunaarummini allappoq.
Great Greenlandip takutitsivimmi tunisassiat 'nutaat pissangartullu' takutissavai.
– Ilaatigut meeqqanut annoraat qalipaatigissut takutissavagut, meeqqanut kavaajat kiisalu pooqattat, isersimmatit aaqatillu nutaanik pissanganartunik qalipaatillit, pisortaq Henrik Estrup allappoq.
Kalaallit aaqqissugaat immikkut ittoq 'Arctic Elements' pissaaq arfininngornermi februaarip 13-ani Great Greenlandip Isaksen Designillu suleqartigiillutik aaqqissuussaat.
Aaqqissuussami takutinneqassapput atisat nutaaliat puisillu amiinik tunisassat, aamma nipilersortartut Søs Fenger, Nukâka Coster-Waldau aamma Juno tusarnaatitsissalutik. Taassuma saniatigut takusaasut kalaallit mamartuliaannik tamussigassinneqassapput.