2010-mi juullimut nipitittagaq unammissutigineqartoq
Juullimut nipitittakkamut ajugaasoq 35.000 kroninnassaaq. Unammisitsinerup nipitittakkamik ikinnerujartortunit pisiarineqartartumik soqutiginninneq annertusassavaa.
2010 tassaavoq nunatsinni juullimut nipitittakkamut soqutiginninnerup annikilliartorneranik allanngortitsisussaq.
Tamanna Juullip Nipitittagaata Aningaasaateqarfiata anguniagaraa. Suliniut aallartillugu 2010-mut Juullip Nipitittagaata isikkussaanik unammisitsisoqassaaq. Ajugaasoq 35.000 kroninnassaaq.
– Neriuutigaarput arlalissuit juullip nipitittagassaanut siunnersuuteqassasut, nipitittakkallu tuniniarnera annertusilluni, Juullip Nipitittagaata Aningaaasaateqarfiani siulittaasoq Steen Jeppson oqarpoq.
Ukiut tallimat kingulliit ingerlanerini juullumut nipitittakkap tuniniarnera annikilliartorsimavoq, 200.000 kroninit amerlanerusumik, aningaasaateqarfik nalunaarpoq.
Tamanna peqquteqarunarpoq ikinnerujaruinnartut juullumut allaffigeqatigiittalersimanerannik. Taamaattumillu juullimut nipitittagaq atorfissakinnerulerluni, Aningaasaateqarfiup siulittaasua isumaqarpoq.
Siorna juullimut nipitittagaq eqqumiitsuliortumit Niels Motzfeldtimit suliarineqarpoq. Nipitittagaq oktobarimi Katuami saqqummiunneqassaaq.
Assiliisartup Leiff Josefsenip pisumi assilisai takukkit uani
Unammisitsinermi peqataarusuttunut nalunaarfissaq tassaavoq februaarip 28-at. Unamminissami malittarisassat piumasaqaatillu nittartakkami uani takuneqarsinnaapput www.christmas-seal.gl