Uuliaarluarneq ilimagisamit annikinneruvoq
Uulia Kangaatsiami maangaannaq aniasoq 75.000 liiterip missaanniissasoq Polaroilip ilimagaa. Uuliaarluerneq arfininngornerup unnuaani pivoq.
Uuliaarluerneq qularnanngitsumik pissuteqarpoq ventilip, uuliamut tankersuit marluk akornanni attaveqarfiusup matuneqarsimannginnera, Polaroilimi pisortaq Peter Grønvold Samuelsen sermitsiaq.ag-mut oqarpoq.
– Ajutoorneruvoq nalaatsortumik pisoq, Peter Grønvold Samuelsen oqarpoq.
Tankit taakkua marluk quleriissimapput, tankilu alleq arfininngornerup unnuaata ingerlanerani ulikkaartoorsimasoq, Polaroil isumaqarpoq.
Orsussamik pilersuisuoqarfiup naatsorsorpaa solaruulia 75.000 liiterip missaaniittoq aniasimasoq. Qujanartumik Kangaatsiami qatsungasimavoq, taamaasilluni uulia umiarsualiviup iluani nunniukkap eqqaanut katersuussimavoq, tamannalu assiaqutinik puttasunik matuneqarsimavoq.
Ilanngullugu Polaroilip umiarsuaq uuliamik assartuut nappartanik dunkinilu usisoq Aasianniit tassunngartippaa.
KNR-imi tusarliunneqarpoq qatserisartut sisamat Sisimiuneersut, politeeq ataaseq Aasianneersoq, upalungaarsimanermut pisortaq Nunaoilimeersullu saliipput, Qaasuitsup Kommmunianilu upalungaarsimanermut pisortap Johan Høgh Hansenip naatsorsuutigaa saliineq aatsaat unnuap ingerlanerani naammassissasoq.
Uulia aniasoq nakkutigineqarpoq.
- Uulia aniasoq nakkutigaarput siammatsaaliorlugulu, uuliali qanorpiaq annertutigisoq aniasimanersoq suli ilisimanngilarput, upalungaarsimanermut pisortaq Johan Høgh Hansen KNR-imut oqarpoq.
Taassuma Peter Grønvold Samuelsenitulli erseqqissarpaa solaruulia pinngortitamut uloriananngitsoq.
- Nammineq aalanngorluni nunguttarpoq, taakkua oqarput.