Uulia aniasoq katersorneqarpoq
Solaruulia arfininngormat unnuakkut Kangaatsiami tankeqarfimmit maangaannaq aniasoq upalungaarsimasut suli katersorpaat.
Kangaatsiami uuliaarluerneq ippassaq nakkutigineqarlualerpoq solaruulialu sapinngisamik annertunerpaaq katersorneqarpoq. knr.gl malillugu taamatut paasissutissiivoq upalungaarsimanermut pisortaq Johan Høgh Hansen.
Uulia 13.100 liiteri katersorneqarsimavoq. Maannakkorpiaq upalungaarsimasut aput uuliamik milluaasimasoq 3 aamma 4 tonsit akornanniittoq katersorpaat.
Solaruulia tankimit, imaanit 300 meterit missaannik ungasissusilimmiittumit aniasimavoq. Qatserisartut, politiit kiisalu PolarOil-imeersut ippassaq solaruulia tankeqarfiup eqqaani kangerliumanermi assersuutinik puttasunik assersorpaat. Qanoq annertutigisoq aniasimanersoq ilisimaneqarluanngilaq nalilerneqarporli 75.000 liiterit missaanniissasoq.
ALLAASERISAQ ATUARUK: Uuliaarluerneq ilimagisamit annikinneruvoq
Umiarsualiovimmi avannamullu sineriammi 1,5 kilometerisut isorartutigisumi suli uuliaqarpoq saattumik. Saaqigamili piffissami sivikitsumi aalanngorluni nungussaaq, Johan Høgh Hansen paasissutissiivoq.
- Kangaatsiami uuliasunni suli sivisulaartumik naaneqarsinnaassaaq. Tamannali uloriananngilaq ikuallalernissaanullu ulorianartoqanngiaq, upalungaarsimanermut pisortaq KNR-imut oqarpoq.