Uuliamik kuuttoqarnerani sakkutuut ikiuuttut
Sapaatip akunnerata naanerani Kangaatsiami uuliap anianerani nakkutilliissut Hvidbjørnen qulimiguulillu ikiuupput.
Arfininngormat ullaap tungaa Kalaallit Nunaanni Sakkutooqarfik Ilulissani upalungaarsimanissamut pisortamit saaffigineqarpoq, nalunaarutigineqarluni Kangaatsiami talittarfiup eqqaani uuliamik aniasoqarsimasoq.
ALLAASERISAQ ATUARUK: Uuliaarluarneq ilimagisamit annikinneruvoq
Sakkutuut ikiueqqullugit qinnuigineqarput, erngerlunilu sakkutuut umiarsuaat Hvidbjørnen Qeqertarsuup avannaaniittoq, sumiiffimmut ingerlatinneqarpoq, forsvaret.dk allappoq.
Hvidbjørnimi qulimiguulik Lynx atorlugu upalungaarsimanissamut pisortaq allallu Ilulissanut aaneqarput Kangaatsiamullu ingerlanneqarlutk.
Timmisartuussinermut atatillugu uuliamik aniaffik qanoq annertutiginersoq misissorneqarpoq.
Kingorna Hvidbjørnen ikiuunnissamut piareersimatinneqarpoq.
Uuliamik aniasoqarneranut atatillugu Sakkutooqarfimmiit Århusimi Søværnets Operative Kommando pisariaqassappat ikiunissamut piareersimasoq saaffigineqarpoq.
Sapaatiummat ualikkut Hvidbjørnip upalungaarsimanissamut pisortap, politiit qatserisartullu Ilulissanut Aasiannullu angallanneqarnerat isumagaa.