Inuusuttut ilinniarnerminnik ingerlatserusuttut
Kalaallit Danmarkimi efterskoleniittut ilinniarnermik aallartitserusupput, Københavnimi Kalaallit Illuutaanniit taamatut ilisimatitsipput.
Kalaallit illuutaanni ilinniagaqarniartunik siunnersuisartut ulluni makkunani ulappupput.
Inuusuttorpassuit ilinniarfissarsiorput, aamma kalaallit inuusuttut Danmarkimi efterskoleniittut.
Pingaartumik Storebæltip kangianiittut, kalaaliaqqat 40-it efterskoleni assigiinngitsuni 27-ni atuartuugamik.
– Arlalissuit nunatsinni ilinniarnertuunngorniarusupput, allat Saviminilerinermik Ilinniarfimmut pileralutik allallu Piareersarfinni qallunaatut, tuluttut matematikimillu pikkorissaqqikkusullutik, ilinniagaqarniartunik siunnersuisartoq Pia Rosing Heilmann oqarpoq.
Ikittuinnaallu suniarnertik suli nalullugu nunatsinnut angerlassanerarpai.
– Ilinniagaqarusuttut taama amerlatiginerat nuannersuuvoq, ilaat siunissami uumasunut nakorsanngorusupput, mekanikerinngorusullutik, innallagisserisunngorusullutik nujalerisunngorsullutilluunniit, Pia Rosing Heilmann oqarpoq.
Pia Rosingilu aamma nammineq efterskolenut pulaartarluni ilinniartunik oqaloqatiginnittarsinnaanerarpoq.
Ataasinngormat Gribskov Efterskolemi ilinniartut tallimat pulaarlugillu siunnersorsimavai ulluinnarnilu misigisartagaat, atuarnerat junimilu angerlarnissaat pillugit oqaloqatigisimallugit.
Ilinniarumalluni nalunaarfissaq martsip aallaqqaataanut killeqarpoq.