Narsami kalaalimineerniarfik nutaaq
Nutaaliaasumik kalaalimineerniarfeqalerput kasseapparatilimmik akiliisarfeqarlunilu nillataartitsivilimmik. Narsami kalaallimineerniarfittaaq ukioq 2010-mut naleqquttuuvoq.
Pingasunngormat narsarmiut pisiniarfimmi nutaaliaasumi neqinik, aalisakkanik timmissanillu nunatsinneersunik pisisinnaalerput, kalaalimineerniarfik nutaaq nalunaaqutaq 16 atoqqaartinneqarmat.
Kalaalimineerniarfittaaq milluunit missiliorlugit akeqarsimavoq, Kaj Egede Kommune Kujallermi teknikimut ataatsimiititaliami siulittaasuullunilu kalaallimineerniarfiup allanngortiterneqarneranut akisussaasuusimasoq taamatut ilisimatitsivoq.
Inerneralu naammagisimaarluinnaqqissaarpaa.
– Nutaamik kalaalimineerniafeqalernitsigut inuussutissat tungaasigut qanoq ittunik anguniagaqarnerput takutipparput, Kaj Egede oqarpoq.
Kommunip kalaallimineerniarfiup aaqqissuunnerani inuussutissalerinermik ilinniarfik INUILI suleqatigisimavaa, taamaalillunilu aamma kommuni inuussutissalerinerup tungaatigut annertuumik pikkorissartitsisanermut suleqataasimavoq.
Kalaaliineerniartarfittaarnikkut kalaaliminersisoqarnerusalernissaa neriuutigineqarpoq.
– Inuussutissalerineq kalaallimerngillu pitsaasut Kommune Kujallermi pingaartittorujussuuagut. Innuttaasut kalaaliminernik pitsaasunik atorluaaneusariaqarput taamalu inuussutissanik avataaneersunik eqqussuinermut pakkersimaarinneqataasariaqarlutik. Tamanna suliffissanik pilersitsinermik inuiaqatigiillu aningaasanik atorluaanerannik kinguneqassaaq, Kommune Kujallermi inuussutissarsiornermut ataatsimiititaliap siulittaasua Kalistat Lund, Siumut, erseqqissaavoq.
– Nutaamillu kalaalimineerniarfeqalernikkut kalaalimerngit pitsaasut suli nittarsaalluarsinnaanerulissavagut, Kalistat Lund nangippoq.