Kangerlussuaq Tourism pisiaraa
Takornariartitseqatigiiffik aningaasaataaruttoorsimasoq Kangerlussuarmi angalatitseqatigiiffiit allat pingasut pisiaraat.
Kangerlussuaq Tourism janurip naanerani aningaasaataaruttoorpoq - massakkullu angalatitseqatigiiffiiit Albatros Travel-ip, Topas-ip Grønlands Rejsebureau-llu, Air Greenland-imit pigineqartup aningaasaataaruttoorsimasoq pisiaraat. Angalatitsisarnermut aviisi Take Off taama allappoq.
Atuaruk allaaserisaq: Kangerlussuaq Tourism aningaasaataaruttoorpoq.
Pingasuusut taakku World of Greenland (WOG, Arctic Circle Kangerlussuarmiittoq pigereerpaat. WOG-ilu taamaalilluni Kalaallit Nunaanni tamakkuleriffinni annersaalissaaq Kalaallit Nunaannilu takornariartitseqatigiiffinni annersanngussalluni.
WOG-ip siulersuisuisa siulittaasuata, Albatros Travelimik piginnittuullunilu allaffissornerani qullersaasup Søren Rasmussenip oqaatigaa, assigiinngitsunik misigissuseqarlutik pisiarisimagitsik, taama ajornakusoortigisunik kisermaassisuuneq pitsaaqutinik ajoqutinillu kinguneqarsinnaammat.
– Julimi augustimilu isertitaqartartussaavugut taakkulu atorlugit ukiup sinnerani ingerlaniartartussaalluta. Suliffeqarfiilli marluuppata aasaanerani pisariaqarluinnartartunik biiliuteqarnissamut aningaasaleeqatigiittoqarsinnaasarpoq. Aasaru ingerlatsinissaq qularnaarumallugu bussit pissarsiarisinnaasagut tamaasa atortariaqassavagut, takeoff.dk-ip taamatut oqarsimanerarpaa.