Illoqarfiup qeqqani pisuttuarneq

Arfinninngormat februaarip 6-anni illoqarfimmi pisuttuarneq aallartippoq Kongevejip Aqqusinersuullu naapiffiani nalunaaqutaq 14.00 akunnerullu ataatsip missaani sivisussuseqarluni.

Arfininngornermi ualikkut piffissap ilaani Nuummi Tuujummi blok P-lu eqqaani inissiatoqqat isaterneqartussat akornanni pisussuaqataaniarlutik inuit 30-niit 40-t tungaanoortut takussimapput, silalu seqinneqaaq, taamattorli anorlerluni nilleqalunilu.

Pisuttuarneq blok P-miit aallartillugu peqataasut quleriinni qulerpaaniit isikkivik misissoqqaarpaat misiginiarlugu blok P-mi najugaqarneq qanoq ittuunersoq.

- Aallartiffitsinniit siullermiit tummeqqani siullerniit illorsuup illuatungaaniilluni isikkivik allarluinnaavoq, peqatasut ilaat oqarpoq, tupaallaatigaalu blok P taama takitigimmat.

Pisuttuarnermi ilussanik tittartaasartut suliaqartuusut peqataaffigisaani innuttaasut periarfissinneqarput illoqarfiup immikkoortuata ineriartortinnerani pilersaarusiamut malinnaanissaaminnut, oqarfigineqarpullu eqqarsaatigissagaat, siunissami illoqarfiup qeqqa qanoq isikkoqartikkusunnerlugu.

- Siunissami illoqarfiup qeqqata qanoq isikkoqarnissaa takorloorsiuk. Aqqusineqassava, pisuinnaat aqquteqarlutik biilinillu inissiisarfeqarluni? Portusuunik inissiarsuaqassava, taakkulu qanoq isikkoqassappat? Eqqarsaatigisiuk allattuillusilu, illussanik titartaasartoq Helena Lennert angalaarnermi oqarpoq.

Tuujummi iliveqarfiup isua tikinneqarmat pisuttutartut unitsinneqarput, eqqarsaatigeqquneqarporlu iliveqarfitoqaq qanoq pissanersoq.

Piiarneqassava qanorlu pineqassava?

- Illora, ajaga, atsaga aannakkukkalu maaniipput. Isumaqarpunga peernqassanngitsoq, peqataasut ilaat oqarpoq.

Pisuttuarneq naggaserlugu peqataasut illussanik titartaasarfiup TNT-p Nuummi Kongevej 2-mi allaffiani kaffillerfigineqarput.