Atuaqatigiit klassit marluk tuberkulosemik misissorneqartut
Nuummi atuaqatigiit klassit marluk ilinniartitsisuilu tuberkulosemik misissorneqartussamik aaversipput, atuartoq ataaseq taamatut nappaateqartoq napparsimasoq paasineqarsimammat.
Nuummik Atuarfik Samuel Kleischmidtimi atuartut 9. a aamma 9. b sapaatit akunneranni kingullermi tamarmik aaversipput tuberkuloseqarnersut misissorniarlugit, taamatut iliortoqarpoq atuartoq ataaseq tunillaassinnaasumik tuberkuloseqartoq paasineqarmat.
– Tuberkulose marluk assigiinngitsuupput. Aappaa tassaavoq tuberkulose suli pilinngitsoq tuniluussinnaanngitsorlu aappaalu tassaalluni tuberkulose tuniluuttartoq napparsimalersutaasartorlu, nuna tamakkerlugu tuberkulosemut tunngatillugu peqqissaasoq Thomas Rindahl oqarpoq.
Atuartoq tuniluuttartumik tuberkuloseqartoq paasineqarsimasoq napparsimavoq Sanamilu uninngatinneqarluni katsorsarneqarpoq.
– Atuartup angajoqqaavi, atuaqatai aamma ilinniartitsisui tamarmik aaverneqarput tunillatsissimanersut misissorneqassallutik. Arlaat tunillanneqarsimappata kiisalu tunillaattartumik tuberkuloseqarpata, taava taakku katsorsarneqassapput. Ukiup afaani ullut tamaasa iisartakkamik ataatsimik iisisassapput, kingusinnerusukkut tuberkulosemik tunillaattartumik napaateqalernissaat pinaveersaarniarlugu, Thomas Rendal oqarpoq.
Sana aassiuinermi misissorneqartut akissutissartaat sapaatit akunnerani matumani tigussavai, kisianni Thomas Rindahl ilisimatitsivoq, tamanna aammattaaq sivisunerusinnaasoq.