Katersuiniarneq suli ingerlavoq
Røde Korsip Haitimut nuna tamakkerlugu katersuiniarnerani sumi tamaani aaqqissuussinerit annertuut annikitsullu suli ingerlanneqarput.
Sisamanngormat Kalaallit Røde Korsiata, KRK-p, Haitimut 720.000 koruunit katersoreersimavai.
Suli aningaasanik tunioraasoqarpoq, allattoqarfimmi pisortaq Kirsten Mortensen sermitsiaq.ag-mut paasissutissiivoq.
Sapaatiummat Tasiilami tusarnaartitsinermut atatillugu akunnerit pingasuinnaat ingerlaneranni KRK-p nuna tamakkerlugu katersuiniarneranut 10.000 koruunit katersorneqarput.
Sapaatip akunnerata naanerani Greenland Venture aningaasaliisutut pingaarnersaralugu Inussivimmi arsaalluni unammiuaartitsinermi 20.700 koruunit isertinneqarput.
Checki pingasunngormat Nuuk Firmafodbld-imeersunit Kalaallit Røde Korsiata siulersuisuinut Katuami tunniunneqarpoq.
Aningaasat taama amerlatiginerannut pissutsit arlallit pisuupput: Ilaatigut timersortarfissuup akunnerni pingasuni unammiuaarnerup ingerlanneqarnerani atorneqarnera akeqanngilaq Coca Cola-lu sodavandinut, unammiuaarnermi tuniniarneqartunut, aningaasaliisuuvoq. Tamatuma saniatigut Nuuk Ugeavisi unammiuaarneq pillugu akeqanngitsumik ussassaaruteqarpoq, KRK paasissutissiivoq.
Nuna tamakkerlugu katersuiniarneq februaatip 28-iata tungaanut ingerlassaaq.