Ileqqutoqqanik qimatsisartut paasilluarusuppaat
Mælkebøttenip Nuummiittup socialforskningsinstitutti SFI suleqatigalugu paasiniarniarpaa sooq meeqqat ilaat ileqqutoqqat qimallugit ajunngitsumik inuuneqalertarnersuq, ilaallu sooq taamaalineq ajortut.
Ilisimatusaatigalugu misissuinissaq taaguuteqarpoq 'Mælkebøttenip meerai – inuttut ajornartorsiornermiit pissusitoqqanik allanngortitsisumut', qulaajassavaalu meeqqat isumaginninnikkut paasiniaanerup nalaani illumiitsinneqartut qanorpiaq ingerlasarnersut.
Tamanna pissaaq meeqqat ukiuni tullerni pingasuni, 2012-ip tungaanut katillugit 60-it missaat Mælkebøtteniminngaanniit nuuttut malinnaaffiginerisigut.
Meeqqat Mælkebøttenimiinnerminni inuuneranni atugassarititaasut tarnimikkullu ingerlanerat nalilersorneqassapput nooreernerisalu kingorna ukiup ataatsip, pingasut aamma tallimaniit arfineq-marluk ingerlaneranni.
Misissuineq ukiuni katillugit qulingiluani ingerlanneqassaaq.
Misissuinermi meeqqanut ajortumik pitsaasumilluunniit allannguutit malinnaaffigineqassapput. Meeqqat kingusinnerusukkut ingerlanerat Mælkebøttenimiissimanerannut attuumassuteqarnersoq, assigiinngissutsit tikkuartorneqarsinnaanersut, assersuutigalugu meeqqat angerlartinneqartartut inissinneqartartunut sanilliunnerisigut aammalu meeqqat qularutissaanngitsumik ajornartorsiulersussat siusinaartumik tikkuartorneqarsinnaanersut. Anguniagaavoq siusinaartumik aallartitsinikkut periarfissat, pitsaaqutit ajoqutillu piareersimaffiginissaat, socialforskningsinstitutti allappoq.
Misissuineq ingerlanneqarpoq Mælkebøttenip kissaateqarneratigut. Bikubenfondip, Trygfondip aamma isumaginninnermut naalakkersuisoqarfiup ukiut siulliit pingasut aningaasanik tapiiffigaat.