Ilinniartut atuakkiorput
Kalaallit ilinniagallit arfineq marluk Danmarkimi ilinniartuuneq pillugu atuakkiorput taasaminnik 'Avalannerit',
Ilinniarniarluni 4.000 kilometerit Danmarkimut angalaneq kalaallinut inuusuttorpassuarnut kulturip allanngorujussuarneratigut tupassutaasarpoq.
Qallunaatut ingerlatitseqqiinermi pikkorissarnermut VUC Nordjyllandip kalaallinut Danmarkip avannaani ilinniartunut neqeroorutaanut atatillugu atugaq pinngorpoq, nordjyske.dk allappoq.
Aalborgimi Kalaallit Illuutaat aqqutigalugu pikkorissarneq neqeroorutaasarpoq, atuagarlu Namminersorlutik Oqartussanit aningaasalerneqarpoq.
Atuakkami 80-nik qupperneqartumi inuusuttut Danmarmiki najugaqarneq, attaveqatigiittarneq, ilinniarneq, ataatsimoorneq, siunissamut pilersaarusiorneq isummanillu pigiliussiinnarneq pillugit oqaluttuarput.
Isummat pigiliutiinnakkat Danmarkimi siumorneqartartut ilagaat 'kalaallit imerajuttuunerat'. Minik Dorph, Aalborgip ilisimatusarfiani civilingeniørinut ilinniartoq taassuma akerlersuinnaanik misilittagaqarpoq.
– Uissuummissutigisama ilagaat qallunaat ilinniartut immiaqqamik atuinerujussuat. Sapaatip akunneri tamaasa ilisimatusarfimmi tallimanngornermi imerniartarfeqartarpoq, tamannalu ilinniakkamik puiguilaarnermut ilinniaqatinillu nuannisaqatitiinnermut atorneqartarpoq. Tamanna nunatsinni sungiusimanngilara, aamma nalusimavara qallunaat ilinniartut taama immiaarartortartiginerat, oqarpoq.
– Amerlanernut qallunaat oqaasii allamiut oqaaseraat, ilaasalu allaniit nalunarnerutittarpaat, Berit Johnsen atuakkamik aaqqissuisoq oqarpoq.