Nuummioq piumaneqarnerit akornanni
Kalaallit Nunaanni pisuusaartitsilluni sarsuatitaliaq Danmarkimi filmfestivalimi CPH:PIX-imi sarsuatitat isiginnaartunit piumaneqarnerpaat qulit akornanniippoq. Sapaatip tungaanut sarsuatitaq taagorneqarnerpaat takutinneqassaaq. Sermitsiaq atuaruk.
Nuummioq Københavnimi pisuusaartitsilluni sarsuatitanut nunarsuaq tamakkerlugu peqataaffigineqartumi festivalimi CPH:PIX-imi ukioq manna apriilip 15-aniit 25-anut takutinneqarnissaminut periarfissaqarpoq.
Sapaatip akunnerini kingullerni marlunni isiginnaartut sarsuatitat siunnersuutigisinnaavaat festivalimi takorusutatik. Siunnersuutit untritilikkaat nassiunneqarsimapput, ilaat qanga filmitsialaat 1932-mersuullutik ilaallu nutaggariit 2010-meersut.
Sarsuatitalli qulit allanit kissaatigineqarnerupput, tassalu ilaatigut Nuummioq Otto Rosingip Torben Bechillu suliaat, taama nalunaarpoq CPH PIX nittartakkamini.
Maannakkut isiginnaartut tassaalerput filmfestivalimi Kalaallit Nunaanni pisuussaartitsilluni sarsuatitaliaq siulleq takutinneqassanersoq, imaluunniit Stanley Kubrickip filmiliaa 'A Clockwork Orange' (1970) imaluunniit 'Vampyr' Carl Th. Dreyerip suliaa (1932), taakkuuppummi siunnersuutigineqartut qulit akornanniittut.
Sapaatiuppat februaarip 21-ata tungaanut nittartakkakkut www.cphpix.dk-ikkut taasisoqarsinnaavoq.