Naatitat qerisut ukiukkut peqqinnarnersaapput
Naatitat poortorlugit qerititat tiguinnariaannaat ukiukkut peqqinnarnerullutillu tangeqarnerusarput naatitanit nutaaninngarnit. Tamanna misissuinerup nutaap takutippaa, ilaatigut eertat nutaat qerisullu misileraaffigineqarsimallutiik.
Naatitat qalipaajarnikut, aggornikut issuujarnikullu qerititat tiguinnariaannaat. Naatitat qerisut nerisassiornermi atoruminartuupput. Taamaakkaluartoq amerlasuut naatitat nutaat piumanerusarpaat, tassa takorloortaratsigu nutaat pitsaanerusut.
Tamatigulli ukiukkut upernassakkullu taamaanneq ajorpoq. Tamanna uppernarsarneqarpoq Norgemi misissuinermit, tassani misissuisuusimalluni ernæringsfysiolog Pernille Baardseth, taamatut allappoq berlingske.dk.
Naatitat qerisut katersuinnavillugit salinneqartarput qeritinneqarlutillu, taamaasilluni mamassutsimik ilarujussuat inuussutissallu arlallit attatiinnartarlugit.
Norskit misissuinerat ilaatigut tunngaveqarpoq eertanik nutaanik qerisunillu misileraanermik, tamakkua C-vitamineqassusiat antioxidanteqassusiallu misissorneqarsimalluni. Eertat qerititassat kissartumik salinneqarput, qeritinneqarlutik assartorneqarlutillu misissorneqannginnerminni, eertallu nutaat katersorneqaannavissut misissorneqarlutik. Misissuinermi angusat tupaallatsitsipput, tassa eertat nutaat qerisullu amerlaqatigiinnik vitamineqarlutillu antioxidanteqarmata.
- Eertat nutaat pisiniarfinnut angerlarsimaffimmilu iganissamut ullut unnuallu arlallit atorlugit anngunniartarmata ilimanarluinnarpoq eertat qerisut nutaaninngarnit inuussutissanik amerlanerusunik akoqartut, Pernille Baardseth tikkuaavoq.
Inuussutissalli pitsaasut arlallait qalaassinermi annaaneqarsinnaapput, naatitat eqqortumik qalaanneqanngippata. Inuussutissartai attatiinnarniaraanni aalartillugit siallugilluunniit pitsaaneruvoq, Pernille Baardseth oqarpoq.
Inuussutissaqassusiallu akianik tunngaveqanngilaq, Torben Leth, Danmarks Fødevareforskningimi immikkoortoqarfimmi pisortaq, oqarpoq. Taanna dr.dk-mut oqarpoq naatitat qerisut akikitsut amerlaqisutigut akisuutut peqqinnartigisartut.