Qulimiguullit 30-nik ukioqalersut

Ullumikkut sakkuttut imarsiortut qulimiguuisa Lynxit Kalaallit Nunaanni Atlatikullu avannaani inuit inuunerannik annaassisartut ukiuni 30-inngortorsiornerat illersornissamut qullersaqarfimmi nalliussineqarpoq.

Illersornissamut qullersaqarfiup qulimiguuliutai Lynxit Kalaallit Nunaanni Atlantikullu avannaani inuunermik annaassisartut ullumi ukiunik 30-inngortorsiorput. Assi: Peter Hove Olesen.

Illersornissamut qullersaqarfiup ullumi sakkutuut imarsiortut qulimiguuliutaasa Lynxit Flyvestation Karupimi angerlarsimaffeqartut ukiuni 30-nngortorsiornerat naliuttorsiutigaa.

Sakkutut imarsiortut umiarsuaanni qulimiguullit sulinermi atortuupput pingaarutillit, Atlantikup Kalaallillu Nunaanni inuit inuunerannik annaassisartut, Adenillu kangerliumarngani piiaasunik malersuisartut igikkasuartakkanik aallaasinik sakkoqarlutik.

Angerlasimaffivii tassaapput Sakkutuut imarsiortut umiarsuaani timmisartuussiviit: Sakkutuut umiarsuaanni nakkutilliititani umiarsuarnilu nutaani ikiuuttuni.

Qanittukkut aamma Sakkutuut imarsiortut umiarsuaaraanniit atorneqalissapput.

Sakkup taamaattup tatiginartup nutaanik anginerusunik qulimiguulinnik taarsernissaa illersornissamut pisortaqarfimmit naalakkersuinermilu suliaqartunit qangali kissaatigineqarsimavoq.

Ukiut tusintilikkaat nikinnginnerinili siullermik Lynxit taarsernissaat eqqartorneqalerpoq.

Illersornissamut pisortap Knud Bartelsep kissaateqarneratigut Illersornissamut qullersaqarfimmi misissorneqalerpoq, qulimiguullit pisoqqat Lynxit suli sivisunerusumik atasinnaanersut, taamaalilluni qulimiguulinnik nutaanik pisinermi milliardilikkaanik aningaasaliinissaq kinguartinneqaqqilluni.

Powered by Labrador CMS