Tunitsiviit atorunnaartut tunniunneqarlik
Jakob Skade, Kattusseqatigiit Partiiat sinnerlugu Inatsisartunut ilaasortaq siunnersuuteqarpoq, tunitsiviit atorunnaartut namminersorlutik inuussutissarsiutilinnut piumasunut tunniunneqassasut.
- Nunaqarfinni tunitsiviit periarfissallit namminersortunngorsarneqarlik, Kattusseqatigiit Partiiat sinnerlugu Inatsisartunut ilaasortaq Jakob Skade tusagassiuutitigut nalunaarummi oqarpoq.
Ukiuni kingullerni tunitsiviit arlaqartut Royal Greenlandimit matuneqartarsimanerat eqqarsaatigalugu kissaatigaa, inuit namminersorlutik inuussutissarsiutillit kisssaatigigunikku tunitsiviit tigussagaat asuli atorneratik uninngaannassanngimmata.
- Aalisakkanut tunitsiviit atorunnaarsimasut tiguneqarnissaat eqqarsaatigalugu suliffeqarfissuup Royal Greenlandip Naalakkersuisullu akornanni allakkatigut saaffiginnittoqareersimammat Kattusseqatigiit Partiianni isumaqarpugut ukiut qulikkaat iluanni tunitsiviit atorunnaarsimasut inussutissarsiuteqartunut kissaateqartunut tunniunneqartariaqartut asuli atorneqannginnerannut taarsiullugu, Jakob Skade allappoq, taassumalu ilisimaaralugulu taperserpaa KNAPK tusagassiuutitigut nalunaarummi ukiuni arlalissuarni aalisakkaat akiisa appasippallaanerannik akuersaarsinnaannginnera.
- Erseqqissarneqartariaqarpoq tunitsiviit ingerlasut akit pitsaanerusut atorlugit ingerlatsinissaat. Aamma isumaqarpunga, tunitsiviit matuneqarsimasut namminersortunut tuniunissaannut tunngatillugu piaartumik aalajangiisoqartariaqartoq, namminersortunimmi inuussutissarsiuteqartoqarpoq nammineq ingerlatsinissamik kissaateqartunik, pisortanit tapiisarneq unitsinneqarluni, kiisalu pisariaqarmat suliffeqarfiit atorunnaarsimasut atorlugit suliffissanik pilersitsinissaq, Jakob Skade allappoq.