Partiit aningaasaqarneq ernummatigaat
Qaasuitsup Kommuneani borgmesteri Jess Svane, kommunalbestyrelsemit kajumissaarneqarpoq kommunip aningaasataannik sukangasuumik aqutseqqullugu.
Qaasuitsup Kommuneani kommunalbestyrelsemut ilaasortat ernummatigaat aningaasatigut sukaterisuqanngippat apriilimi kommuni aningaasaataarunnissaa, knr.gl allappoq.
- Ullumikkutut ingerlannaassappat missingersuutit naapertorlugit kommunip karsia apriilip qaammataani imaarutissaaq, Timooq Mølgaard Atassummiit oqarpoq.
- 2009-mi aningaasaliissutit qaangerneqarput, 2009-milu suliarisimasarput 2010-mi naqqaniit aallarteqqissavarput, tassalu 2009-mi sipaarutissatut aalajangiussat nassaareqqittariaqassallugit, Bendt B Kristiansen Inuit Ataqatigiinniit oqarpoq.
- Siusinnerusukkut oqaatiginikuuarput aningaasaqarneq sukaterneqartariaqartoq, decembarimimi kommunimi kukkunersiuisut oqarput, aningaasatigut sukumiisumik aqutsisoqarsimanngitspoq, Demokratiniit Ane Lone Bagger oqarpoq.
Borgmester Jess Svane kommunip karsia qanoq imaqarnersoq oqarusunngilaq, ullormiimmi ullormut allanngorarpoq, oqarlunili aningaasatigut sukangasuumik aqutsinissaq pilersaarutaasoq.
- Aningaasaqarnermut ataatsimiititaliamiit kommunalbestyrelsemut qinnuteqarpugut kommunip aningaasaqarnerata qitiusumik aqunneqalernissaa pillugu, tamannalu akuerineqarpoq, borgmester Jess Svene oqarpoq, partiinit tamanit piumaffigineqartoq ullut tamaasa sukangasuumik aningaasaqarnermik aqutseqqullugu.