Norsami ilaasoq peqqarniisaartoq
Air Greenlands Airbus-ia 330 Norsaq marlunngormat Kangerlussuarmiit Københavniliartoq ilaasumik peqqarniisaartoqarnera pissutigalugu Keflavikiliartinneqartariaqalersimavoq, taassumallu massakkut akiliisitaarujussuarnissani naatsorsuutigissavaa.
Norsaq marlunngormat ualikkut Kangerlussuarmiit Københavniliartoq Keflavikiliartinneqarmat Islandimi politiit ilaasoq peqqarniisaartoq utaqqivaat.
Ilaasoq timmisartup iluani peqqarniisaarsimavoq, timmisartumilu sulisut ilaasut sinnerisa isumannaatsuunissaat isumagisinnaajunnarmassuk Islandimi politiit atassuteqarfigineqarput, taakkulu Norsaq mimmat ilaasup peeqarniisaartup tigunissaanut piareersimapput.
Pilersaarutit malillugit timmisartoq Keflvikimut millatsiaannarsinnarluni Københavnimut ingerlaqqippoq.
Immikkut iliuuseqarneq taanna qanoq naleqarsimanersoq Air Greenlandip naatsorsorsimanngilaa, mianersortumilli naliliinikkut orsussamik immikkut ittumik atuineq, immikkut sulineq, mittarfimmut akiliutit il.il. ikinnerpaamik 100.000 kroninik naleqarsimassangatinneqarput.
– Taamatut pisoqartillugu iliuuserineqartartut aalajangersimasuupput, tassalu akiligassat ilaasumut immikkut mittoqartariaqalernereanut peqqutaasumut akiligassanngortinneqartarput, Air Greenlandimi paasissutissiisartoq Pia C. Bang oqarpoq.