Qatserisartut atugaat pitsaanerulissapput
Kommunqarfik Sermersuumi Sanaartornermut Avatangiisinullu immikkoortoqarfiup qatserisartut atugaat pitsanngorsaaviginiarlugit qatserisartut atortui sulinerminnilu atugaat misissuiffigilerpai.
Sanaartornermut avatangiisinullu immikkoortoqarfik siullermik november 2008-imili atortunik sulinermilu atukkanik misissuilluni aallartippoq, sermersooq.gl allappoq.
Kommunimi illoqarfiit nunaqarfiillu sinneri 2010-mi misissuiffigineqassapput, misissuinerlu naammassippat ukiuni tallimani tulleriiaarinissamik pilersaarusiortoqassaaq kommunimi tamarmi atortut sulinermilu atugassarititaasut assigiissaarneqassammata.
Sanaartornermut avatangiisinullu immikkoortoqarfik isumaqarpoq, Kitaani Tunumilu atuakkanik naligiissaarinissaq pissutigalugu piffissami qanittumi aningassaliisoqarnissaa pingaartuusoq.
Isumaqartoqarportaaq Tasiilami ukiut tulliuttut tallimat ingerlanerini nutaamik 8-10 millioner kroninik nalilimmik qatserisarfiliortoqartariaqartoq. Sanaartornermut Avatangiisinullu immikkoortoqarfik aamma isumaqarpoq qatserutinik nutaanik aamma nunaqafiliaanneqarsinnaasunik pisoqartariaqartoq.
Illoqqortoormiunut Tasiilallu nunaqarfiinut 4 hjulstrækkerinik immikkut ittunik 60 literinik imiisivittaqarlutillu 50 meterinik takissusilinnik slangetalinnik aaqqissuussisoqarsimavoq.
Sanaartornermut Avatangiisinullu immikkoortoqarfik januarimi Paamiunut tikeraarsimavoq majimilu aamma Illoqqortoormiuliartussaallutik. Tasiilaq nunaqarfiilu junimi julimilu orninneqassapput, Arsullu aamma julimi, sermersooq.gl taama allappoq.