Thue Christiansen 70-iliivoq
Thue Christiansen, eqqumiitsuliortoq erfalasutsinnillu titartaasoq ullumikkut 70-iliivoq.
Thue Christiansen, eqqumiitsuliortoq Namminersornerullutik Oqartussani allaffimmi pisortaasimasoq ullumikkut 70-iliivoq, nordjyske.dk taama allappoq.
Thue Christiansen, ullumikkut Danmarkimi najugaqartoq Marmorilimmi Uummannap eqqaaniittumi inunngorsimavoq. Nalunaarasuartaaserisoq Hans Christiansen aaamma Marie Lyberth angajoqqaaralugit. Nuliaraa peqqissaasuusimasoq Katrin, marluullutillu pingasunik qitornaqarput qulingiluanillu erngutaqarlutik, tamarmik Nuummi najugaqartunik.
Thue Christiansen Maniitsumi peroriartorsimavoq realskolemilu Nuummiittumi atuarsimalluni. Tassanngaanniit Støvring Højskolemiissinnarluni Haderslev Statseminariumimi ilinniasimavoq, 1964-imilu naammassisimalluni.
Thue Christiansen 1979-ip tungaant Danmarkimi Kalaallit Nunaannilu ilinniartitsisutut sulisimavoq. 1979-83-imi Siumut sinnerlugu kultureqarnermut naalakkersuisuuvoq.
Thue Christiansen frimærkinik Kalaallit Nunaannilu suliffeqarfiit assigiinngitsut ilisarnaatissaannik titartaasarsimavoq, 1980-kkunnilu Kalaallit Nunaanni politikikkut sakkortuumik oqallittoqareersorlu aalajangiunneqarpoq Thue Christiansen kalaallit erfaasussaannut siunnersuutissamik titartaasinneqassasoq.
Tassani takuneqarsinnaavoq seqineq sikuinnarsuarmiit nuilersoq. Qalipaatit qaqortoq aappaluttorlu ammalortumiittut qeqqisigut avittarlugit imminnut paarlangasunngortillugit inissinneqarsimapput.