Atuarfimmi nakkutilliisut kajumissaaserneqarput
Nuummi Kangillinnguit Atuarfiani atuarfimmi nakkutilliisut umiatsiamik angalanissaminnut Nunafondenimit 12.000 kroninik tapiiffigineqarput.
Atuarfimmi nakkutilliisut Kangillinnguup Atuarfiani aqqusinikkut angallannermik isumannaannerulersitsisut angallammik angalaarnissaminnut Nunafondenimiit 12.000 kroninik tapiiffigineqarput.
Taassuma saniatigut atuarfimmi nakkutilliisut atisanik kusanartunik tunineqarput, taamaalilluni Nuummi ukiuni arlalinni atuarfimmi nakkutilliisoqaannarnissaa tunngavissaqalerluni.
Atisat Starkimersupput, Ittu.net Godthåb Dampvaskeri peqatigalugu ukiumi issinnerata nalaani atisanik oqortunik pisinissamut aningaasaliisuullutik.
Taassuma saniatigut atuarfimi nakkutilliisut allanik aningaasaliisorpassuaqalerput, taamaalilluni atuartut ukiuni aggersuni peqataaginnarnissaat tunngavilerneqarluni.
Aningaasaliisut ilaatigut makkuupput: Malermester Stærke, OC-electronic, SSSPK, Brugsen, Grønlandsbanken, Svømmehallen Malik, Lions Club, Royal Artic Line, Godthåb Transport aamma BKF kiisalu Kommuneqarfik Sermersooq.
- Aningaasaliinerit ima kinguneqarput, atuartut nakkutilliillutik sulinissaminnut pitsaasunik atisaqalerlutik, aamma ukioq ataaseq naluttarfimmut isissutissamik, filmeriarnissami juullimilu tunissutissanik tunisinnaalerlugit. Aamma Nunafondenimit angallammik angalaanissamut aningaasaliiffigineqarpugut, atuarfimmi nakkutilliisuni tuniliaqutaasoq Allan Kirkegaard oqarpoq.
Atuarfimmi nakutilliisoqalernissamik isuma pinngorpoq, Kangillinnguit Atuarfiani kissaatigineqarsimammat atuarfimmut aqqutip isumannaannerulernissaanik, ingammik ullaakkut angallanneq annertuallaalersimammat.
Atuarfimmi nakkutilliisut oktober 2009-mi aallartipput, ullullu atuarfiusut tamaasa ingerlanneqarlutik.
- Atuartut suliniut nuannareqaat. Aallaqqaammut atuartut arfineq pingasuinnaat aallartipput, maannakkullu 16-inngorpugut. Sulilu amerlarnerit peqataarusupput, amerlanerusinnaanngilagulli. Nammineq akisussaaffeqarneq ilikkarpaat, napparsimasoqartillugu allatigulluunniit pisinnaanngittoqartillugu taartissamik pissarsiortarlutik, Allan Kirkegaard oqarpoq.
Maannakkut Kangillinnguit Atuarfiat kisimi atuarfimmi nakkutilliisoqarpoq, atuarfiulli pisortaanerata Nuummi atuarfinni allani peqalernissaq akueraa.
- Atuarfinni allani nakkutilliisoqalernissaanut ikiuunniarlunga neqerooruteqarpunga, oqartoqaannarsinnaalerporlu. Nuummi politiit qanittumik suleqatigaavut, ilaatigut atuartitsinermi aammali ullaakkut periarfissaqartillutik saqqumilaartarlutik, Allan Kirkegaard oqarpoq.