RAL: Angallassinerup sivisussusaa allanngunngilaq
-Brugsenimi Pisiffimmilu nioqqutissat pisoqalisoorpata, tamanna RAL-ip angallassinerata sivisussussaanut tunngassuteqanngilaq, assartuinerummi sivisussusaa allanngunngilaq, Brugsenip Pisiffiullu assartuinermut pilersaarummik nutaamik isornartoriornerannut atatillugu RAL akissuteqarpoq.
Kalaallit Nunaani Brugseni aamma Pisiffik ullumi RAL-ip assartuinermi pilersaarutaa nutaaq sakkortuumik isornartorsiorpaat, tamanna pisisartunut kiffartuussinerminnut ajorseriartitsimmat.
Niuertarfiutileqatigiit ataatsimoorullugu tusagassiuutitigut nalunaarumminni allapput, ukiorpanni Kalaallit Nunaannut nioqqutissanik nutaanik pitsaanerusunik amerlanerusunillu pilersitsiniarlutik suliniuteqarsimallutik, RAL-illi assartuinermi pilersaarutaata tamanna qanga nunasiaasimanermut pissutsinut uterteqqikkaa.
Tamannali RAL-imi attaveqatigiinnermut pisortap Jakob Strømip ilumuunnginnerarpaa.
- Paaserusupparput, Brugsenip Pisiffiullu paasissutissat suminngaaniit pissarsiarineraat. Eqqunngillammi. Assartuinerup sivisussusaa taannaajuarsimavoq, tassalu Aalborgimiit Nuummut ullut arfinillit affarlu. Eqqorpoq umiarsuup tulliata tikeqqinnissaanut ullut marlussunnik sivitsortut, kisianni assartuineq sivitsunngilaq.
- Allappatalu assartuinerup sivitsorneranik peqquteqartumik nioqqutissat pisoqalisoortut eqqarneqartartut tamanna eqqunngilaq.
-Nioqqutissat Aalborgimi umiarsuup aallarfissaannut anngunniartarneranut ajornartorsiuteqarnersut pillugu aperisinnaavasi. Kisianni assartuinerup sivisussusaa taannaajuaannarpoq, Jakob Strøm allappoq.
Royal Arctic Linep Brugsen aamma Pisiffik kajumissaarpaat, nioqqutissanik kaaviaartitsinermik annikillinerannut upernarsaatit pillugit oqaloqatiginneqqullugit, suullu eqqarnerusalersimanerlugit. Brugsenip Pisiffiullu saaffiginninnissaat qilanaaraarput.
- Sooq Royal Arctic Linep assartuinermi piffissat allanngortippai?
-Tassani peqqutaavoq umiarsuit imaqangningajattarnerat. Assartuinermi pilersaarut taamaallaat januaarimut, februaarimut marsimullu tunngatillugu allanngortinneqarsimavoq, qaammatinimi taakkunani naammattunik assartugassaqarneq ajorpoq. Qaammatini pingasuni taakkunani ullut arfineq marlukkaarlugit Kalaallit Nunaannut akilersinnaasumik assartuinissaq tunngavissaqanngilaq, Jakob Strøm oqarpoq.