RAL-ip assartuinermut pilersaarutaa nutaaq isornartorsiorneqaqaaq
Kalaallit Nunaani Brugsenip aamma PisiffiupRAL-ip assartuinermut pilersaarutaa nutaaq pisisartunut kiffartuussinermik ajorseriartitsisussaq annertuumik isornartorsiorpaat.
- Ukiuni arlaqaqisuni Kalaallit Nunaannut nioqqutissanik nutaanik amerlanerusunik pissarsiniarnermi annertuumik sulisoqareersorlu, RAL-ip nioqqutissanik nutaanik pilersuineq qanga nunasiaasimanermut uterteqqiinnariaavaa. Ataatsimoorussamik RAL-imut saaffiginnissumminni Pisiffiup aamma Brugsenip maluginiaqquaa, kiffartuussinerup ajorseriarneratigut kalaallit pisisartut piffinni nutaani 2010-mi piumasaqaataannik naammassinnissinnaaneq ajorseriassammat, Kalaallit Nunaani Brugsenip pisortaa, Olav Thomsen aamma Pisiffimmi pisortaaneq, Per Steen Larsen, ataatsimoorullugu tusagassiuutitigut nalunaarumminni allapput.
Assartuinermi pilersaarut Namminersorlutik Oqartussat akuerisimasaat malillugu, umiarsuit assartuutit ullut qulikkaarlugit umiarsualivinnut tikittassapput. Siusinnerusukkut tamanna sapaatip akunnikkaarluni pisarpoq.
- Siusinnerusukkut assartuinermut pilersaarut naapertorlugu pilersaarusiorlutalu aaqqissuisimavugut. Tamanna siusinnerusukkut assartukkat tikittarnerisa akuttussusaat eqqarsaatigalugu ajornaatsuinnaasimanngilaq, nioqqutissammi nutaat peqqinnartullu neqeroorutigerusuppavut. Ullut pingasunik ilanerat tusaannarlugu ajornarpasinngikkaluarpoq, tamannali nioqqutissat killilimmik atasinnaanerannut atatillugu taamaaqqajanngilaq, pisortat marluk allapput.
Oktobarimi RAL-ip assartuinermut pilersaarutaata tusarniaassutigineqarneranut atatillugu niuertarfiutileqatigiit sakkortuumik maluginiaqqusimavaat, Aalborgimiit akuttunerusumik aallartalernissaq ilaatigut kinguneqassammat, assartuinerup svitsorneratigut nioqqutissat nutaat neqeroorutigineqarnerannut ajorseriartitsissasoq, kiisalu nioqqutissanik pisoqalisoortunik eqqaaneq annertunerulerluni. Taama siulittuineq tunngavissaqasimasoq takuarput, allapput.
- Nunani avannarlinisuut kalaallit pisisartut soorlu naatitatigut pilersorneqarnerat ingerlassinnaajunnaarparput. Timmisartukkut assartuineq periarfissaanngilaq, assartuinermi akit qaffasippallaarnerat peqqutigalugu nioqqutissat tunisinnaanaviannginnatsigik. Naak tassani iluanaarutissaq appasinnerpaaffissamiitikkaluarlutigu, allapput.
Ilisimatitsissutigaat umiarsuup tikinneratigut nioqqutissanik aalajangersimasunik niuertarfimmiittoqaqqileraangat pisisartut toqqaannertumik eqqanaarsartalersimammata. Taamaalillutik arlallit aggilussinnartarput. Nioqqutissanik pisoqalisoortunik igitsisarnermut ilanngullugu sivisunerumik assartuisarneq pisisartunit kamaatigineqarlunilu naammagineqanngilaq.
- Soorunami paasisinnaavarput RAL akilersinnaasumik ingerlanneqartariaqartoq. Eqqortuusinnaanngilarli suliffeqarfik assartuinermi kisermaassiffiusoq Kalaallit Nunaanni atuisuni namminersortut niuernermillu tunngaveqarlutik ingerlatsisut qulaatiinnarlugit aalajangiisinnaasoq. Periutsit nutaat ullutsinnullu naleqquttut atorlugit ineriartorneq pisariaqartipparput, kingumut uternerunngitsoq, allapput.