Sermersuumi meeqqat atugarisaat nukittorsarneqassapput

Siunnersusoqatigiit Kommuneqarfik Sermersuumi meeqqat atugaasa pitsanngorsarnissaanut borgmesterimik siunnersuissussaq siullermeertumik ataatsimeeqqammerpoq.

Kkommuneqarfik Sermersuumi meeqqat atugaat nukittorsarneqassapput. Assi: Leiff Josefsen.

Siunnersuisoqatigiit, Advisory Board regarding Children´s Rights, Kommuneqarfik Sermersuumi meeqqat atugaasa pitsanngorsarnissaanut borgmesterimik siunnersuissussaq februaarip 24-ani 2010 siullermeertumik ataatsimeeqqammerput.

Taama allappoq sermersooq.gl.

Ataatsimiinnermi siullermi qulequtarineqarpoq Kalaallit meerartaat pissutsit allangulerfianni, ilaatigut eqqartorneqarluni meeqqat atugaasa tunngavissannik pitsannguiniarnermi suliniutit suut kommunimit ingerlanneqassanersut.

Atuarfiup, sunngiffiup, peqqinnissakkut isumaginninnikkullu suliniutit imminnut taputartuunnerat aamma ataatsimiinnermi eqqartorneqarpoq, kiisalu meeqqat atugaasa pitsanngorsarnissaannut suliniutini periutsit suut innersuussutigineqarsinnaanersut.

Borgmester Asii Chemnitz Narupip siunnersuisunik pilersitsinermut tunngavilersuutigaa, Sermersuup Kommuniani meeqqat atugaasa nukittorsarnissaannik kommunalbestyrelse pingaarnerut siunertaqarmat.

Siunnersuisoqatigiinni aamma FN-ip meeqqat pillugit aalajangersagai aamma aallaavigineqassapput.

Siunnersuisoqatigiit qinigaaffik naallugu atasussat makkuupput:

Karl Kristian Olsen, KIIIN, Namminerslutik Oqartussat

Birgit Niclasen, Peqqissutsimut Naalakkersuisoqarfik, Namminersorlutik Oqartussat

Charlotte Guldberg, Pisortaq, Skodsborg Observationscenter, Danmark

Leena Evic, pisortaq, Pirurvik Center, Nunavut, Canada.

Leena Evic ataatsimiinnermi siullermi peqataasinnaanngilaq, ataatsimiinnerulli tulliani peqataassalluni, oktober 2010-mi imikkut ittumik ingerlanneqartussami.

Siunissami siunnersuisoqatigiit ukiumut ataasiarlutik ataatsimiittassapput siunertaraallu pitsaasunik siunnersuuteqarnissaq, taamaattorli kommunip meeqqat atugaannik sulinerannut isornartorsiuilutik saqqummiussaqartassallutik.

Powered by Labrador CMS