Ilisimatusarfimmi ulloq nalliuttorsiorfik
Ilisimatusarfimmi tallimanngornermi ukiumoortumik nalliuttorsiortoqarpoq, ilaatigut nersornaammik doktorinngortitsisoqassalluni, ph.d-ngortumut kiisalu kandidatinngorlutillu bachelorinngortunut uppernassaatinik tunniussisoqassalluni.
Tallimanngornermi februaarip 26-ani Ilisimatusarfimmi ukiumoortumik nalliuttorsiornermut atatillugu kandidatit bachelorillu nutaat soraarummeernermik allagartaannik tunineqassapput.
Aamma Ilisimatusarfiup oqaluttuarisaanerani ph.d.-ngortumut siullermik Kathrine Kjærgaardimik ph-d-ngortitsisoqassaq suliaanut:
”Kalaallit Nunaanni kristumiuussutsimik upperisaqarnerup ineriartornera assilissallu kristumiorpaluttut kalaallinit pingaartinneqarnerat 1721–2008”.
Soraarummeertussat immikkullu ittumik suliat bachelorinngornermilu suliaat makkuupput
Kandidatit immikkut ittumik suliallit
Allaffissornermut immikkortortaq:
- Lone Rosengreen Petersen: Kalaallit inuiaassutsimut atatillugu misigisimanerisa ineriartornerat, politiki socilpsykologilu aallaavigalugit
- Peter Grønvold Samuelsen: Kalaalit Nunaanni aqutseriaseq. Kalaallit Nunaanni aqutsinermik misissueqqissaarneq
- Najaaraq Kreutzmann: Aatsitassarsiorneq - Inuussutissarsiut nappataasoq?
Kulturimut inuiaqatigiilnnilu oqaluttuarisaanermut immikkoortortaq
- Axel Jeremiassen: Avannaata landsrådii 1911-1932, Aasianniit ilaasortap suliniutai aallaavigalugit
Bachelorit bacheloritut sulialit
Allaffissornermut immikkoortortaq:
- Hanne Rasmussen: Nuummi meeqqat Kalaallit Nunaannii naalakkersinikkut inooqatigiinnut ilanngukkiartornerat. Kalaallit Nunaanni ukioq 2009-mi naalakkersuinikkut periutsit iluanni kalaallit meerartaannut tunngatillugu isumaginninnikkut suut attumassuteqarpat? Upernaakkut 2009-mi Nuummi meeqqat atuartut akornanni kisitsisit aallaavigalugit misissuineq.
- Lars Falksen: Tele Greenland A/S-ip kisermaassinera - Namminersortunngorsarneqassava?
- Louise Adolfsen: Inuiattut misigissutsip pinngoriartortanerata naalakkersuinikkullu isummertarnerit misissornerat
- Nina Berglund Jakobsen: Aaqqissuussaaneq aqutsinerlu suiaassutsimut atatillugu
- Samo Nielsen: Kalaallit Nunaanni 1994 – 2006-mi inuaqatigiit aningaasaqarneta ineriartornera
- Janus Chemnitz Kleist: Kalaallit Nunaanni nunaqarfiit - sussavagut? nunaqarfiit namminersorlutik oqartussat naalakkersusullu nalunaarutigisartagaat aallaavigalugit ineriartornerata oqallisiginera. Aammalu illoqarfiit nunaqarfiillu akornanni niueqatigiinnerup annertusinissaanik siunnersuutit allaaserineqarnerat.
Kulturimut inuiaqatigiilnnilu oqaluttuarisaanermut immikkoortortaq
- Niels Kleemann: Ejnar Mikkelsen Scoresbysundillu pilersinnera
- Navarana Kotawala: Nuummi upperisarsiornikkut ilagiit ullumikkut Kalaallit Nunaannut isiginnittaasiat
- Søren Andreasen: Ejnar Mikkelsen Scoresbysundillu pilersinneqarnera
Oqaatsinut, atuakkiornermut tusagassiuteqarnermullu immikkoortortaq
- Aviaq Jørgensen: Jessie Kleemann - eqqumiitsuliortoq imaluunniit oqallissaarisoq? Taalliat Taallat - Digte – Poems misissornerat
- Beatrine Heilmann: FST-mi Kalaallit Nunaanni taggisit taartissaat
- Judithe Denbæk: Kalaallit Nunaanni 'Wordformation' - Incorporation til Inderivation. Inderivationip verbaliseringillu akornanni
- Aviaja Lyberth: Starring: Hollywood stars
Isumaginninnermut immikkoortortaq
- Aviaja Olsvig aamma Mai Skole: Ataatsimoorullugu bachelorinngorniut: Meeqqat inuusuttullu angerlarsimaffiup avataanut inissinneqartut sunniutigisinnaasaat
Soraarummeersitsineq Ilimmarfiup kantiinani pissaaq nalunaaqutaq 10.00 aallartissalluni.