Hesselbjerg 60-iliivoq

Ukiut qulit pisoqarfioqisut qaangiutissapput, Torsten Hesselbjerg ataasinngorpat januaarip 18-ianni 60-iliippat.

Rigspolitichefiusimasoq Torstenb Hesselbjerg, januaarip 18-ianni 60-iliissaaq. Nunatsinni inunngorsimavoq ullumilu nunatsinni parnaarussiveqarnerup aaqqissuuteqqinneqarnerani peqataalluni. Ass.: Polfoto: Peter Hove Olesen

Kingullermik akunnaalliliigamili Torsten Hesselbjerg rigspolitichefitut atorfik angusimavaa, politiini annertuumik nutarsaasimalluni inatsisinillu atortitsinermut ministerimit soraarsitaasimalluni.

Taamatut allappoq ritzau.

Soraarsitaaneq pivoq politiinik aaqqissuusseqqinnermi paatsiveerusimaarnerup kingorna, tamanna amerlasuut politiini ajornartorsiutit aaqqinnagit annertuseriaannarsimanerannik isigimmassuk. Hesselbjerg pisortaagami akisussaasuusariaqarpoq, iluaqutaanngilarlu aviisimi saqqummiunneqarmat pisortaanermini Politiit Qullersaqarfiata aningaasaatai atorlugit Rio de Janeiro-mut week-enderluni nuannaariarsimasoq.

Rigspolitichefitut "tunuaraluarluni" Hesselbjerg suliassaaleqinngilaq.

Pinerluuteqarsimasunik Isumaginniffiup sukkasuumik parnaarussiveqarnermi pisortatut atorfimmik neqeroorfigaa.

- Inatsisilerituujuvoq pikkorilluinnartoq, uatsinnullu tunissutaavoq suliunnaartinneqarmat, Pinerluuteqarsimasunik Isumaginniffiup pisortaa William Rentzmann oqarpoq.

Hesselbjergip Pinerluuteqarsimasunik Isumaginniffimmi taaguutigai inatsisilerinermut immikkoortoqarfimmi oqartussaassuseqartitaq pisortarlu.

Aamma Kalaallit Nunaanni parnaarussiveqarnerup ineriartortinnissaanut qallunaat sinniisuini siuttuuvoq.

Tamatumani inuuissiortumut inatsisilerituutut ilinniagaqarsimasumut iluaqutaavoq nammineq Kalaallit Nunaanni inunngorsimagami, Nuummi peroriartorluni. Ilaquttanilu Danmarkimut nuupput, tappavani Københavnimi gymnasiarlunilu inatsisilerituutut ilinniagaqarluni, tamatumalu kingorna politiini, eqqartuussivinni kingornalu parnaarussiveqarfimmi ukiuni 34-ini atorfeqarpoq.

TDorsten Hesselbjerg nuliilu Hanne Hesselbjerg Schmnidt, Højesteretimi eqqartuussisutut toqqagaaqqammersoq, Hillirødimi najugaqarput.

Powered by Labrador CMS